ક્રિકેટ જગતમાં લોકપ્રિય બનેલી ઇન્ડિયન પ્રીમિયર લીગ (આઇપીએલ)ની 19મી સીઝનનો 28 માર્ચે બેંગુલુરુમાં ગત વર્ષની ચેમ્પિયન રોયલ ચેલેન્જર્સ બેંગલોર અને સનરાઇઝર્સ હૈદરાબાદ વચ્ચે પ્રથમ મેચ સાથે પ્રારંભ થયો હતો. ચેન્નાઇના એમ. ચિન્નાસ્વામી સ્ટેડિયમમાં રમાયેલી પ્રથમ મેચમાં ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB)એ સનરાઈઝર્સ હૈદરાબાદ (SRH)ને હરાવીને આ ટુર્નામેન્ટમાં વિજયી પ્રારંભ કર્યો હતો. બીજી મેચમાં મુંબઈનો વિજય થયો હતો.
આગામી બે મહિના દરમિયાન દસ જુદી જુદી ફ્રેન્ચાઈઝીની ટીમો 70 મેચ રમશે અને તેને અંતે બે ક્વોલિફાયર્સ અને એક એલિમિનેટર મેચ અને અંતે ફાઇનલ મેચ રમાશે. આમ આ વર્ષે કુલ 74 મેચ રમાશે.
આ ટુર્નામેન્ટની બીજી મેચમાં રોહિત શર્મા અને રાયન રિકેલટોનની વિસ્ફોટ બેટિંગના કારણે મુંબઈ ઈન્ડિયન્સે કોલકાતા નાઈટ રાઈડર્સ સામે 6 વિકેટે વિજય મેળવ્યો હતો. કોલકાતાની ટીમે નિર્ધારીત 20 ઓવરમાં ચાર વિકેટે 220 રન નોંધાવ્યા હતા, જેની સામે મુંબઈની ટીમે માત્ર 19.1 ઓવરમાં ચાર વિકેટે 224 રન નોંધાવી જીત મેળવી લીધી હતી. કોલકાતા નાઈટ રાઈડર્સ તરફથી ઓપનિંગમાં આવેલા અજિંક્ય રહાણેએ 40 બોલમાં પાંચ સિક્સ અને ચાર ફોર સાથે 67 રન, અંગક્રિશ રઘુવંશીએ 29 બોલમાં બે સિક્સ અને છ ફોર સાથે 51 રન, ફિન એલને 17 બોલમાં બે સિક્સ અને છ ફોર સાથે 37 રન બનાવ્યાં હતાં.
ટુર્નામેન્ટની પ્રથમ મેચમાં સનરાઈઝર્સ હૈદરાબાદે 20 ઓવરમાં 9 વિકેટના નુકસાન પર 201 બનાવ્યા હતાં. આ ટાર્ગેટને પાર પાડવા ઉતરેલી RCB ટીમે 15.4 ઓવરમાં 4 વિકેટના નુકસાન પર આસાનીથી 6 વિકેટે જીત મેળવી હતી. ચેલેન્જર્સ બેંગલુરુ વતી ઇમ્પેક્ટ પ્લેયર દેવદત્ત પડિક્કલે 7 ચોગ્ગા અને 4 છગ્ગાની મદદથી માત્ર 26 બોલ પર 61 રન બનાવ્યાં હતાં. કોહલીએ અણનમ 69 બનાવ્યાં હતાં.
સનરાઇઝર્સ હૈદરાબાદ(SRH) વતી ઈશાન કિશને 38 બોલમાં 80 રન બનાવ્યા હતાં, જેમાં 8 ચોગ્ગા અને 5 છગ્ગા સામેલ હતા. અનિકેત વર્માએ માત્ર 18 બોલમાં 43 રન (4 છગ્ગા, 3 ચોગ્ગા) ફટકારી હૈદરાબાદને 200 રનને પાર પહોંચાડવામાં મહત્વની ભૂમિકા ભજવી હતી. RCB તરફથી જેકબ ડફી અને રોમારિયો શેફર્ડે 3-3 વિકેટ ઝડપી હતી.
