ઇરાન સામે 28 ફેબ્રુઆરીએ આક્રમણ કર્યા પછી કોઇ મોટી સફળતા ન મળ્યાં પછી અમેરિકાના પ્રેસિડન્ડ ડોનાલ્ડ ટ્રમ્પે હવે ગ્રાઉન્ડ ઓપરેશન ચાલુ કરીને તહેરાનના આશરે 400 કિલોગ્રામ સંવર્ધિત યુરેપિયન અને ક્રૂડ ઓઇલના મહત્ત્વના ભંડારો પર કબજો મેળવવાની યોજના બનાવી હોવાનુ સોમવાર, 30 માર્ચે મીડિયા અહેવાલોમાં જણાવાયું હતું. જોકે ઇરાને પણ ગ્રાઉન્ડ ઓપરેશનના કિસ્સામાં અમેરિકાના સૈનિકોને નરકમાં મોકલવાની ધમકી આપી હતી. બીજી તરફ મધ્યપૂર્વમાં સંઘર્ષનો અંત લાવવા માટે પાકિસ્તાનમાં મધ્યપૂર્વના દેશોની એક બેઠક પણ યોજાઈ હતી.
ધ વોલ સ્ટ્રીટ જર્નલે એક રીપોર્ટમાં જણાવ્યું હતું કે ટ્રમ્પે તેમના સલાહકારોને યુદ્ધ સમાપ્ત કરવાની શરત તરીકે અણુ બોંબ બનાવવાની સામગ્રી સોંપવા માટે તેહરાન પર દબાણ કરવાની સૂચના આપી છે. ટ્રમ્પે અમેરિકાના રાજકીય સાથીઓને સ્પષ્ટપણે સંકેત આપ્યો છે કે તેહરાન પરમાણુ સામગ્રી રાખી શકશે નહીં અને જો ઈરાન વાટાઘાટોના ટેબલ પર આ સામગ્રી સરન્ડર કરવા તૈયાર ન થાય તો બળજબરીથી તેને કબજે કરવાની ચર્ચા કરી છે.
આની સાથે ટ્રમ્પે નોંધ્યું હતું કે પાકિસ્તાની દૂતોના માધ્યમથી થઈ રહેલી પરોક્ષ વાટાઘાટોમાં પ્રગતિ થઈ શકે છે. પાકિસ્તાન, ઇજિપ્ત અને તુર્કીએ અમેરિકા અને ઈરાન વચ્ચે મધ્યસ્થી તરીકે કામગીરી કરી રહ્યાં છે.
ઈસ્લામિક રિપબ્લિક પાસે 400 કિલોગ્રામથી વધુ 60 ટકા અત્યંત સમૃદ્ધ યુરેનિયમ અને લગભગ 200 કિલોગ્રામ 20 ટકા વિભાજન પરમાણુ સામગ્રી હોવાનું માનવામાં આવે છે.
પેન્ટાગોન ખાડીમાં 10,000 જેટલા વધારાના સૈનિકો તૈનાત કરવાની યોજના બનાવી રહ્યું હોવાના અહેવાલ છે. યુએસ સેન્ટ્રલ કમાન્ડે ગયા અઠવાડિયે જાહેરાત કરી હતી કે 2,500 મરીન સહિત 3,500 થી વધુ સૈનિકો મધ્ય પૂર્વમાં પહોંચી ગયા છે.
વોશિંગ્ટન પોસ્ટે ભૂતપૂર્વ યુએસ લશ્કરી અધિકારીઓ અને નિષ્ણાતોને ટાંકીને અહેવાલ આપ્યો હતો કે બળજબરીથી યુરેનિયમ જપ્ત કરવાની કોઈપણ હિલચાલ જટિલ અને ખતરનાક હશે. સંભવિત કાર્યવાહીનો ઈરાન જોરદાર પ્રતિકાર કરશે અને તેનાથી યુદ્ધ લાંબું ખેંચાશે.
પ્રેસિડન્ટ ટ્રમ્પે ઇરાનના ખાર્ગ ટાપુ અને ક્રૂડ ઓઇલના ભંડાર કબજે કરવાના પણ સંકેત આપ્યા છે. ખાર્ગ ટાપુ તેહરાનનું મુખ્ય ઓઇલ નિકાસ હબ છે. ટ્રમ્પે જણાવ્યું હતું કે “સાચું કહું તો મને ઈરાનમાંથી તેલ લેવું ખૂબ ગમે છે, પણ અમેરિકામાં રહેતા કેટલાક મૂર્ખ લોકો કહે છે, ‘તમે આવું કેમ કરી રહ્યા છો?’ પણ તેઓ મૂર્ખ લોકો છે.”
