બ્રિટિશ ઇન્ડિયન જ્યુઇશ એસોસિએશન (BIJA) દ્વારા લંડનની લો ફર્મ બ્રાયન કેવ લેઇટન પેઇસનર (BCLP) ખાતે એક ખાસ એન્ટરપ્રાઇઝ એન્ડ કોમ્યુનિટી કાર્યક્રમનું આયોજન કરવામાં આવ્યું હતું. જેમાં યહૂદી અને ભારતીય સમુદાયની પ્રતિઠિત વ્યક્તિઓએ હાજરી આપી હતી. મુખ્ય સેશન પછી, લોર્ડ સ્ટુઅર્ટ પોલાક અને લોર્ડ ક્રિશ રાવલને BIJA કોમ્યુનિટી એવોર્ડ્સથી નવાજવામાં આવ્યા હતા.
આ પ્રસંગે રેગાટ્ટાના CEO અને જ્યુઇશ લીડરશીપ કાઉન્સિલના અધ્યક્ષ કીથ બ્લેકે મુખ્ય વક્તવ્યમાં કહ્યું હતું કે “આજે સાંજે BIJA કાર્યક્રમમાં બોલવું અદ્ભુત છે અને અમે બંને લઘુમતી સમુદાયોની છીએ જેમના પરિવાર પ્રત્યે પ્રતિબદ્ધતા, સખત મહેનત, ઉદ્યોગસાહસિકતા અને ઘણું બધું અને મૂલ્યો સમાન છે. એક યહૂદી સમુદાય તરીકે, અમે ક્યારેક થોડા અલગ હોવાનું અનુભવીએ છીએ, તેથી અન્ય સમુદાયોમાં મિત્રો હોવા ખરેખર મહત્વપૂર્ણ છે. હું ઈચ્છું છું કે BIJA તેના કાર્યમાં સફળતા મેળવે.”
બ્રિટિશ એશિયન ટ્રસ્ટના ફાઇનાન્સર અને અધ્યક્ષ લોર્ડ જીતેશ ગઢિયાએ મુખ્ય વક્તવ્યમાં કહ્યું હતું કે “BIJA કાર્યક્રમમાં બીજી વખત બોલતા મને આનંદ થયો છે. મારા સમુદાયને યહૂદી સમુદાય માટે ખૂબ સ્નમાન છે. ભારતીય સમુદાયને પૂર્વગ્રહ સામે લડવા અને અમારા ધાર્મિક મકાનોનું રક્ષણ કરવામાં જ્યુઇશ સમુદાય તરફથી મદદ, સમર્થન અને માર્ગદર્શન મળ્યું છે, અને બ્રિટિશ ભારતીય સમુદાય હંમેશા અમારા જ્યુઇશ મિત્રો સાથે ખભેથી ખભો મિલાવીને ઊભો રહેશે.”
લોર્ડ ક્રિશ રાવલે કહ્યું હતું કે “આ પુરસ્કાર મેળવવો એ એક મહાન સન્માન છે. અમારા બંને સમુદાયોમાં લોકોને એકસાથે લાવવાની નોંધપાત્ર ક્ષમતા છે અને અમે અલગ થયા વિના અસંમત થઈ શકીએ છીએ.”
BIJA ના સહ-અધ્યક્ષ ઝાકી કૂપરે કહ્યું હતું કે “આ મુશ્કેલ સમયમાં – વિશ્વભરમાં ભૌગોલિક રાજકીય સંઘર્ષ ચાલી રહ્યો છે અને આ રૂમમાં આપણામાંથી ઘણા લોકો ઇઝરાયલ અને અન્યત્ર પરિવાર અને મિત્રો માટે ચિંતિત છે. આપણને વધુ આંતરધાર્મિક જોડાણની જરૂર છે. આજનો કાર્યક્રમ ભારતીય અને યહૂદી સમુદાયો વચ્ચેની મિત્રતા દર્શાવે છે, તે ખૂબ જ મહત્વપૂર્ણ છે. BIJA આપણા બે સમુદાયો વચ્ચેના સંબંધ માટે સંગઠનાત્મક ઘર તરીકે અસ્તિત્વ ધરાવે છે. આપણા સમુદાયો કદમાં અલગ હોઈ શકે છે પરંતુ આપણે ઘણી બધી સમાનતા ધરાવીએ છીએ.”
કીથ બ્લેક અને લોર્ડ જીતેશ ગઢિયાનો ઇન્ટરવ્યુ BCLP પાર્ટનર શિવાની સંઘી દ્વારા લેવામાં આવ્યો હતો.
