એટલાન્ટ સ્થિત અમેરિકાની એરલાઇન ડેલ્ટા એરલાઇન્સે મંગળવાર, 24 માર્ચે જાહેરાત કરી હતી કે તે કોંગ્રેસના સભ્યો માટેની વિશેષ સેવાઓ સ્થગિત કરશે. કંપનીએ અમેરિકાના એર ટ્રાવેલને ખોરવી નાંખનારા અમેરિકાની સરકારના આંશિક શટડાઉનનું કારણ આપ્યું હતું.
અમેરિકાની બીજી એરલાઇન્સ જેમ ડેલ્ટા પણ વોશિંગ્ટન જતા અને આવતા સાંસદોને ખાસ સેવાઓ પૂરી પાડે છે. એરલાઇને હવે કહ્યું હતું કે કોંગ્રેસના સભ્યોને હવે સીટ અપગ્રેડ અથવા રિબુકિંગ જેવી અન્ય સેવાઓ માટે એરપોર્ટ એસ્કોર્ટ્સ અથવા VIP ટ્રીટમેન્ટ મળશે નહીં. જોકે સાંસદોના રિઝર્વેશન માટે ખાસ ફોન લાઇન ચાલુ રહેશે.
તાજેતરના દિવસોમાં મુસાફરોને એરપોર્ટ પર લાંબા સમય સુધી સિક્યુરિટી ચેક માટે રાહ જોવી પડી રહી છે. કારણ કે ટ્રાન્સપોર્ટેશન સિક્યોરિટી એડમિનિસ્ટ્રેશન (TSA)ના કર્મચારીઓએ પગાર વિના કામ કરવું પડતું હોવાથી ઘણી જગ્યાએ સ્ટાફની અછત સર્જાઈ છે. અનેક TSA કર્મચારીઓ નોકરી છોડતા કે ગેરહાજર રહેતા હોવાથી એરપોર્ટ પર ભારે અવ્યવસ્થા સર્જાઈ છે.
ટ્રમ્પ સરકારે એરપોર્ટ પર ભીડ નિયંત્રણ માટે ઇમિગ્રેશન એજન્ટોને તહેનાત કર્યા છે. પરંતુ TSA કર્મચારીઓએ આ અંગે વાંધો ઉઠાવ્યો છે, કારણ કે આ એજન્ટો પાસે એરપોર્ટ સિક્યુરિટી માટે જરૂરી તાલીમ નથી. આ શટડાઉન ઇમિગ્રેશન નીતિ અંગે રાજકીય મતભેદને કારણે થયું છે. આનાથી હોમલેન્ડ સિક્યોરિટી ડિપાર્ટમેન્ટના ખર્ચ માટેનું ફંડિંગ બંધ થયું છે.
ડેલ્ટા એરલાઈન્સનો આ નિર્ણય માત્ર VIP સુવિધાઓ સુધી સીમિત નથી, પરંતુ તે સમગ્ર અમેરિકન એર ટ્રાવેલ સિસ્ટમ પર શટડાઉનના વધતા દબાણનો સંકેત આપે છે.
