ગત વર્ષે ‘સૈયારા’, ‘એક દીવાને કી દીવાનિયત’ અને ‘તેરી ઇશ્ક મેં’ જેવી રોમેન્ટિક ફિલ્મો રીલીઝ થઇ હતી. હવે બે વર્ષમાં કોમેડી ફિલ્મો જોવા મળે તેવી સંભાવના છે. 2026 અને 2027માં ‘હૈ જવાની તો ઇશ્ક હોના હૈ’, ‘વેલકમ ટુ ધ જંગલ’, ‘ધમાલ 4’, ‘ભાગમ ભાગ 2’, ‘હેરા ફેરી 3’ અને ‘ગોલમાલ 5’ જેવી કોમેડી ફિલ્મો રિલીઝ થશે. આ દરમિયાન હવે વધુ એક લોકપ્રિય ફિલ્મની સીક્વલ ‘મલામાલ વીકલી 2’ના નિર્માણની તૈયારી થઇ રહી છે.
સૂત્રો કહે છે કે, આ ફિલ્મની ટીમે બીજા ભાગ માટે એક મજબૂત અને રસપ્રદ વિચાર પર તૈયારી શરૂ કરી છે. જોકે, કહેવાય છે કે, આ સીધી સિક્વલ નહીં હોય. આ વખતે પાત્રો અને પરિસ્થિતિ અલગ રહેશે, પરંતુ પ્રથમ ભાગની જેમ જ આ ફિલ્મ લાલચું ગામ લોકો અને મોટી રકમ મેળવવા માટે તેમણે કરેલી અજીબ હરકતો પર આધારિત રહેશે. ફિલ્મમાં કામ કરવાની પરેશ રાવલે હા કહી છે, પરંતુ તેને સત્તાવાર સ્વીકારી નથી.
જ્યારે રિતેશ દેશમુખ અને રાજપાલ યાદવ સાથે પણ ચર્ચા થઇ રહી છે. ઉલ્લેખનીય છે કે આ ત્રણેય કલાકારો 2006માં રિલીઝ થયેલી ‘માલામાલ વીકલી’માં હતા. ફિલ્મની કહાની ગામના એકમાત્ર શિક્ષિત વ્યક્તિ કેન્દ્રિત છે, જેને ખબર પડે છે કે ગામનો એક વ્યક્તિ 1 કરોડ રૂપિયાની લોટરી જીતી ગયો છે.
પરંતુ એ વિજેતા મોતને ભેટ્યો હોય છે. ત્યારબાદ ગામલોકો લોટરી ઇન્સ્પેક્ટરથી સત્ય છુપાવવા અને લાલચુ સરપંચને અજાણ રાખવા માટે અનેક વિચિત્ર યોજનાઓ બનાવે છે અને ત્યાંથી જ શરૂ થાય છે ગજબનો ગોટાળો. આ ફિલ્મનું દિગ્દર્શન પ્રિયદર્શને કર્યું હતું. ફિલ્મમાં રીમા સેન, શક્તિ કપૂર, સુધા ચંદ્રન તેમજ સ્વ. અસરાની, રસિકા જોષી વગેરે હતાં.
