લંડનમાં લિસ્ટિંગ ધરાવતા ભારતીય ટેલિકોમ ગ્રુપ એરટેલ આફ્રિકાએ બુધવાર, 25 માર્ચ 2026ના રોજ જણાવ્યું હતું કે સુનિલ ભારતી મિત્તલ જુલાઈ 2026માં કંપનીની AGM પછી બોર્ડના ચેરમેન તરીકે નિવૃત્ત થશે. ગોપાલ વિટ્ટલને તે જ તારીખથી નોન-એક્ઝિક્યુટિવ ચેરમેન તરીકે નિયુક્ત કરાયા છે, જ્યારે શ્રવિણ ભારતી મિત્તલ ડેપ્યુટી ચેરમેનની ભૂમિકા સંભાળશે.
શ્રવિણ મિત્તલના ડેપ્યુટી ચેરમેન તરીકેનો કાર્યભાર સંભાળવાથી એરટેલ આફ્રિકાના સ્થાપક પરિવાર અને નોંધપાત્ર શેરધારક સાથે સાતત્ય સુનિશ્ચિત થશે. એરટેલ આફ્રિકા હાલમાં આફ્રિકાના 14 દેશોમાં ટેલિકોમ્યુનિકેશન અને મોબાઇલ મની સેવાઓ પૂરી પાડે છે.
કંપનીએ એક નિવેદનમાં જણાવ્યું હતું કે સુનીલ ભારતી મિત્તલે જુલાઈ 2026માં આ વર્ષની AGMના સમયે બોર્ડના અધ્યક્ષ તરીકે નિવૃત્તિ લેવાના તેમના ઇરાદાની જાણ બોર્ડને કરી છે, મિત્તલ 2019માં લિસ્ટિંગ થયા પછી અધ્યક્ષ તરીકે સેવા આપી રહ્યા છે. બોર્ડ આ સમયગાળા દરમિયાન તેમના નેતૃત્વ અને યોગદાન બદલ તેમનો આભાર માને છે.
વિટ્ટલે ભારતી એરટેલને તીવ્ર સ્પર્ધાત્મક બજારમાં ઊંચો બજારહિસ્સો મેળવવામાં મોટી ભૂમિકા ભજવી હતી. તેમને ઓક્ટોબર 2024માં એરટેલ આફ્રિકાના નોન એક્ઝિક્યુટિવ ડાયરેક્ટર તરીકે નિયુક્ત કરાયા હતાં.
