ઇરાન યુદ્ધ સાતમાં દિવસમાં પ્રવેશ્યું છે ત્યારે અમેરિકાના પ્રેસિડન્ટે જણાવ્યું હતું કે ઈરાન બિનશરતી શરણાગતિ સ્વીકારે નહીં ત્યાં સુધી તેઓ આ યુદ્ધને અટકાવશે નહીં. અમેરિકા અને તેના સાથી દેશો ઈરાનને આર્થિક રીતે વધુ સદ્ધર અને પહેલા કરતાં વધુ મજબૂત બનાવવા માટે અથાક મહેનત કરશે, પરંતુ તહેરાને બિનશરતી શરણાગતિ સ્વીકારીને સ્વીકાર્ય નેતાની પસંદગી કરવી પડશે.
ટ્રમ્પે તેમના ટ્રુથ સોશિયલ પર એક પોસ્ટમાં લખ્યું હતું કે ઈરાન બિનશરતી શરણાગતિ ન સ્વીકારે ત્યાં સુધી કોઇ ડીલ થશે નહીં. શરણાગતિ તથા એક મહાન અને સ્વીકાર્ય નેતાની પસંદગી પછી અમે અને અમારા ઘણા સાથી અને ભાગીદારો દેશો ઈરાનને વિનાશમાંથી બહાર લાવવા માટે અથાક મહેનત કરીશું. તેને આર્થિક રીતે પહેલા કરતાં વધુ મોટું, સદ્ધર અને મજબૂત બનાવીશું.
તેમણે ઇરાનના લોકોને સંદેશ આપતા જણાવ્યું હતું કે ઈરાનનું ભવિષ્ય ઉજ્જવળ હશે. મેઇક ઇરાન ગ્રેટ અગેઇન.
અગાઉ શુક્રવારની સવારે ઈરાનના પ્રેસિડન્ટ મસૂદ પેઝેશ્કિઆને X પરની એક પોસ્ટમાં કહ્યું હતું કે કેટલાક દેશોએ મધ્યસ્થીના પ્રયાસો શરૂ કર્યા છે. જોકે તેમણે આ દેશોના નામ કે વધુ વિગતો જાહેર કરી ન હતી. તેમણે જણાવ્યું હતું કે અમે સ્પષ્ટ કરીએ છી કે અમે આ ક્ષેત્રમાં કાયમી શાંતિ માટે પ્રતિબદ્ધ છીએ, પરંતુ અમને અમારા દેશની ગરિમા અને સત્તાનું રક્ષણ કરવામાં સહેજ પણ ખચકાટ નથી. જેમણે ઈરાની લોકોની ક્ષમતાને ઓછી આંકીને આ સંઘર્ષ ભડકાવ્યો છે તેવા લોકોએ પણ મધ્યસ્થીઓએ ધ્યાનમાં રાખવા જોઇએ.
