અમદાવાદ શહેરની ઘીકાંટા વિસ્તારમાં આવેલી ડિસ્ટ્રિક્ટ રજિસ્ટ્રાર એન્ડ સ્પેશ્યલ મેરિજ રજિસ્ટ્રેશન ઓફિસમાં મંગળવાર, 3 માર્ચે હિન્દુ યુવતી અને મુસ્લિમ યુવકના લગ્ન રજિસ્ટ્રેશન સામે હિન્દુ સંગઠનોએ ઉગ્ર વિરોધ કર્યો હતો. યુવક અને યુવતીએ તેમના લગ્નની નોંધણી કરવા આવ્યા ત્યારે હિન્દુ સંગઠનોએ ત્યાં પહોંચીને ભારે વિરોધી દેખાવ કરીને જણાવ્યું હતું કે આ ઘટના લવજેહાદ છે. ગાંધીનગરના કરોલીની એક હિન્દુ મહિલા અને કઠવાડાનો એક 27 વર્ષીય મુસ્લિમ પુરુષ સ્પેશિયલ મેરેજ એક્ટ હેઠળ તેમના લગ્ન નોંધણી કરવા આવ્યાં હતાં.
યુવતીને વકીલના ડ્રેસમાં લાવવામાં આવી હતી. તેનાથી ત્યાં હાજર વકીલોમાં પણ ભારે રોષ ફેલાયો હતો. એક વરિષ્ઠ વકીલે જણાવ્યું હતું કે આજે કોર્ટમાં એક મહિલા અને એક પુરુષ વકીલ ન હોવા છતાં વકીલના સ્વાંગમાં આવ્યા હતાં, જેની જાણ અમે કારંજ પોલીસ સ્ટેશનને કરી હતી, પોલીસી આવી હતી અને બંને વિરુદ્ધ કાયદેસરની કાર્યવાહીની બાહેંધરી આપી હતી.
યુવતી નરોડાના સલમાન મન્સૂરી નામના યુવક સાથે કોર્ટ મેરેજ કરવા પહોંચી હતી. યુવતીના પરિવારજનો અને હિન્દુ સંગઠનોએ આને ‘લવ જેહાદ’ ગણાવીને વિરોધ કર્યો હતો. ઘટનાની જાણ થતાં જ પોલીસ કાફલો સ્થળ પર દોડી આવ્યો હતો અને મામલો થાળે પાડવાનો પ્રયાસ કર્યો હતો.
વિરોધ વધુ તીવ્ર બનતા ભાજપના ધારાસભ્ય કૌશિક જૈન અને બજરંગ દળના નેતા જ્વલિત મહેતા ઘટનાસ્થળે પહોંચ્યા હતાં. ધારાસભ્ય જૈને ભલામણ કરી હતી કે આગળ કોઈ પગલાં લેવામાં આવે તે પહેલાં યુવતીને તેના માતાપિતાને મળવા માટે બહિયાલ લઈ જવામાં આવે.
