ગુજરાતમાં મંગળવાર દિવસભર અને રાત્રે માવઠાથી જનજીવન ખોરવાયું હતું તેમજ જુદા જુદા જિલ્લામાં 19 લોકોના મોત થયા હતા. રાજ્યના 103 તાલુકામાં વરસાદ નોંધાયો, જેમાં ભાવનગરના મહુવામાં 4 કલાકમાં 7 ઈંચ વરસાદ પડ્યો. આણંદમાં 2.28 ઈંચ, અમરેલીના લાઠીમાં 2.50 ઈંચ, સાવરકુંડલામાં 2.15 ઈંચ અને 40થી વધુ તાલુકામાં અડધા ઈંચથી વધુ વરસાદ નોંધાયો હતો. અમદાવાદ, ગાંધીનગર, સૌરાષ્ટ્ર-કચ્છમાં વહેલી સવારથી ધોધમાર વરસાદે રસ્તાઓ પર પાણી ભરાયા હતા અને વાહનવ્યવહારને અસર થઇ હતી. હવામાન વિભાગે 7 મે માટે ભરૂચ, સુરત, અમરેલી, ભાવનગરમાં રેડ એલર્ટ અને બનાસકાંઠા, પાટણ, વડોદરા, નર્મદા, ડાંગ, વલસાડ, રાજકોટ, જૂનાગઢ, કચ્છ સહિતના જિલ્લાઓમાં ઓરેન્જ એલર્ટ જાહેર કર્યું છે.
આ માવઠાથી ખેતીને ગંભીર અસર થઇ હતી. મહુવામાં સાંજે 6થી 8 વચ્ચે 3 ઈંચ વરસાદ પડ્યો, જ્યારે વલસાડમાં વાવાઝોડાએ સરદાર સ્ટેડિયમની છતના પતરાં ઉડ્યાં હતા. વરસાદી ઘટનાઓના કારણે એક જ દિવસમાં 19 લોકોના મોત થયા, જેમાં ખેડામાં 4, વડોદરામાં 3, અમદાવાદ-અરવલ્લી-દાહોદમાં 2-2 મૃત્યુ નોંધાયા. આ મોત ઝાડ પડવા, વીજળી પડવા, હોર્ડિંગ અને દીવાલ પડવાને કારણે થયા હતા. આ ઉપરાંત વિવિધ જિલ્લામાં 26 પશુઓના મૃત્યુ થયા હતા. કૃષિ નિષ્ણાતોના મતે, જૂનાગઢ અને ગીર સોમનાથમાં આ કમોસમી વરસાદથી કેરીના પાકમાં સોનમાખ અને પાકવામાં સમસ્યા ઊભી થઈ શકે છે.
હવામાન વિભાગની આગાહી મુજબ, 8 મેના રોજ સાબરકાંઠા, વડોદરા, નર્મદા, ભરૂચ, સુરત, રાજકોટ, અમરેલી, ભાવનગર, કચ્છમાં ઓરેન્જ એલર્ટ છે, જ્યારે 9 મેના રોજ બનાસકાંઠા, છોટા ઉદેપુર, ભરૂચ, સુરત, રાજકોટમાં ઓરેન્જ એલર્ટ રહેશે. આ વરસાદે ખેડૂતોના તૈયાર પાકને નુકસાન પહોંચાડ્યું, ખાસ કરીને જુવાર, બાજરી અને તલ જેવા ઉનાળુ પાકને. વલસાડમાં આંબાઓ પરથી કેરી ખરી પડી, જેનાથી ખેડૂતોને આર્થિક નુકસાન થયું છે. આ પરિસ્થિતિમાં લોકોને સતર્ક રહેવા સરકારે અપીલ કરી હતી.
