ભારતે યુનાઇટેડ નેશન્સની ઇકોનોમિક અને સોશિયલ કાઉન્સિલની કમિટીઓની ચારેય ચૂંટણીઓમાં બિનહરીફ જીત મેળવી છે, જેમાં ભૂતપૂર્વ સીનિયર ડિપ્લોમેટ પ્રીતિ સરન કમિટી ઓન ઇકોનોમિક, સોશિયલ એન્ડ કલ્ચરલ રાઇટ્સ (CESCR)માં ફરીથી ચૂંટાયા છે. 8 એપ્રિલે યોજાયેલી ચૂંટણીમાં, કમિશન ઓન સાયન્સ એન્ડ ટેકનોલોજી ફોર ડેવલપમેન્ટ, કમિટી ઓન નોન-ગવર્નમેન્ટલ ઓર્ગેનાઇઝેશન અને કમિટી ફોર પ્રોગ્રામ એન્ડ કોર્ડિનેશનમાં પણ ભારતનો વિજય થયો હતો. આ તમામ ચૂંટણી સર્વસંમતિથી યોજાઇ હતી, જેમાં કોઇએ વિરોધ નોંધાવ્યો નહોતો. વિદેશ મંત્રાલયના ભૂતપૂર્વ સેક્રેટરી સરન CESCRમાં વ્યક્તિગત રીતે ફરીથી ચૂંટાયા હતા, તેઓ ગત વર્ષે આ કમિટીનાં વડાં હતા. ઇન્ડિયન ફોરેન સર્વિસમાં તેમની 36 વર્ષની કારકિર્દી દરમિયાન તેઓ વિયેતનામમાં ભારતના એમ્બેસેડર હતા. આ ઉપરાંત ટોરોન્ટો, જીનીવા, ઢાકા, કૈરો અને મોસ્કોમાં પણ ફરજ બજાવી ચૂક્યા છે. CESCRના 18 સ્વતંત્ર નિષ્ણાતો ઇન્ટરનેશનલ કોવેનન્ટ ઓન ઇકોનોમિક, સોશિયલ એન્ડ કલ્ચરલ રાઇટ્સની કામગીરીનું નિરીક્ષણ કરે છે.
