ભર ઉનાળે ગુજરાતમાં હવામાન વિભાગની આગાહી મુજબ મંગળવારે વિવિધ વિસ્તારોમાં કમોસમી વરસાદ થયો હતો. ગરમીના પ્રકોપ વચ્ચે વાતાવરણમાં એકાએક પલટો આવ્યો હતો અને 49 તાલુકામાં હળવાથી મધ્યમ વરસાદ થયો હતો. વેસ્ટર્ન ડિસ્ટર્બન્સને રાજ્યનું વાતાવરણ પલટાયું હતું.બુધવારે પણ માવઠાની આગાહી કરાઈ હતી. સૌરાષ્ટ્ર, કચ્છ, દમણ અને ઉત્તર ગુજરાતમાં વરસાદ થવાની સંભાવનાઓ છે.
રાજ્યની આપત્તિ વ્યવસ્થાપન ઓથોરિટી SEOCના ડેટા મુજબ રાજ્યમાં સૌથી વધુ વરસાદ અરવલ્લી જિલ્લાના સાઠંબામાં 2.13 ઈંચ નોંધાયો હતો. ગાંધીનગરના માણસામાં 1.91 ઈંચ અને અરવલ્લીના બાયડ તાલુકામાં1.38 ઈંચ વરસાદ ખાબક્યો હતો. પંચમહાલના શહેરામાં 1.3 ઈંચ અને મહેસાણાના વિજાપુરમાં 1.06 ઈંચ વરસાદ નોંધાતા રસ્તાઓ પર પાણી ફરી વળ્યા હતાં.
આ ઉપરાંત સાબરકાંઠાના તલોદ અને હિંમતનગરમાં અનુક્રમે 26 મીમી અને 24 મીમી જેટલો વરસાદ નોંધાયો હતો. પંચમહાલના મોરવા હડફમાં પણ 24 મીમી વરસાદ થતાં વાતાવરણમાં ઠંડક પ્રસરી ગઈ હતી. દાહોદ, મહીસાગર, આણંદ, મહેસાણા અને ભાવનગર જિલ્લાના વિવિધ તાલુકાઓમાં હળવાથી મધ્યમ ઝાપટાં પડ્યા હતાં.
