અમદાવાદમાં યોજાનારી 2030 કોમનવેલ્થ ગેમ્સની તૈયારીઓની સમીક્ષા કરવા માટે કોમનવેલ્થ સ્પોર્ટસનું એક પ્રતિનિધિમંડળે બુધવારે, 8 એપ્રિલે ચાર દિવસની ગુજરાતની મુલાકાતે આવ્યું હતું. આ પ્રતિનિધિમંડળે ગાંધીનગરમાં ગુજરાતના મુખ્યપ્રધાન ભૂપેન્દ્ર પટેલ સાથે બેઠક યોજી હતી અને મુખ્યપ્રધાનને જુલાઈ 2026 દરમિયાન ગ્લાસગોમાં યોજાનારી કોમનવેલ્થ ગેમ્સમાં હાજરી આપવા અને તેની વ્યવસ્થાનો અભ્યાસ કરવા આમંત્રણ આપ્યું હતું અને મુખ્યપ્રધાને આ આમંત્રણ સ્વીકાર્યું હતું.
કોમનવેલ્થ સ્પોર્ટના પ્રમુખ ડોનાલ્ડ રુકારેના નેતૃત્વમાં પાંચ સભ્યોનું પ્રતિનિધિમંડળ, ભારતીય ઓલિમ્પિક એસોસિએશન (IOA)ના અધિકારીઓ સાથે 8થી 11 એપ્રિલ સુધી રાજ્યમાં રહેશે.
ગયા વર્ષે નવેમ્બરમાં કોમનવેલ્થ સ્પોર્ટની સામાન્ય સભા દરમિયાન ગુજરાતના અમદાવાદ શહેરને ઔપચારિક રીતે 2030 કોમનવેલ્થ ગેમ્સના યજમાન અધિકારો આપવામાં આવ્યા હતાં.
રાજ્યના પાટનગર ગાંધીનગરમાં રાજ્યના મુખ્યમંત્રી ભૂપેન્દ્ર પટેલ સાથે સૌજન્ય મુલાકાત સાથે પ્રતિનિધિમંડળે પોતાનો પ્રવાસ શરૂ કર્યો હતો. કોમનવેલ્થ સ્પોર્ટના પ્રમુખ રુકારે અને સીઈઓ કેટી સેડલેરે ગુજરાતમાં મળેલા ઉષ્માભર્યા સ્વાગત અને આતિથ્યની પ્રશંસા કરી હતી.
મુખ્યપ્રધાન ભૂપેન્દ્ર પટેલે X પર લખ્યું હતું કે ડોનાલ્ડ રુકારેના નેતૃત્વ હેઠળના પ્રતિનિધિમંડ સાથે ગાંઘીનગરમાં બેઠકથી આનંદ થયો હતો. આ પ્રતિનિધિમંડળની ગુજરાતની પ્રથમ સત્તાવાર મુલાકાત હતી. મુખ્યમંત્રીએ પ્રતિનિધિમંડળ અને IOA ને ખાતરી આપી હતી કે રાજ્ય સરકાર કોમનવેલ્થ ગેમ્સના સફળ આયોજન માટે તમામ જરૂરી સુવિધાઓ અને માળખાગત સુવિધાઓ પૂરી પાડશે.
