સુરતની પ્રિવેન્શન ઓફ ક્રાઈમ બ્રાન્ચ (PCB) અને સ્પેશિયલ ઓપરેશન ગ્રુપ (SOG)એ સંયુક્ત કાર્યવાહી કરીને શહેરના રાંદેર વિસ્તારમાં નકલી વિઝા બનાવવાના એક રેકેટનો પર્દાફાશ કર્યો હતો અને પ્રતીક શાહ નામના વ્યક્તિની ધરપકડ કરી હતી. પોલીસે વિઝા સ્ટીકર ફેક્ટરીમાંથી યુકે, કેનેડા, મેસેડોનિયા, સર્બિયા, ચેકોસ્લોવાકિયા અને અન્ય ઘણા યુરોપિયન દેશોના નકલી વિઝા સ્ટીકર જપ્ત કર્યા હતાં.
પોલીસની પ્રારંભિક તપાસમાં બહાર આવ્યું હતું કે પ્રતિક શાહે આ નકલી સ્ટીકર દિલ્હી, ચંદીગઢ, પંજાબ અને હરિયાણામાં એજન્ટોને સપ્લાય કર્યા હતાં. છેલ્લા 10 વર્ષમાં પ્રતિક શાહે લગભગ 700 નકલી વિઝા સ્ટીકરો બનાવ્યા હતા, જેમાં પ્રત્યેક માટે 15,000 રૂપિયા વસૂલવામાં આવ્યા હતા. કેટલાક વ્યક્તિઓ આ નકલી વિઝાનો ઉપયોગ કરીને વિદેશ પ્રવાસ કર્યો હોવાનું માનવામાં આવે છે અને પોલીસ હાલમાં તેમની ઓળખની તપાસ કરી રહી છે. આ રેકેટમાં સામેલ છ એજન્ટોને પણ વોન્ટેડ જાહેર કરવામાં આવ્યા છે.
પોલીસે જણાવ્યું હતું કે શાહે ખૂબ જ કાળજીપૂર્વક સ્ટીકર બનાવ્યા હતા જેથી તે અસલી દેખાય, અને દરેક સ્ટીકર બનાવવામાં લગભગ સાત દિવસ લાગ્યા હતા. નકલી સ્ટીકર કુરિયર દ્વારા એજન્ટોને મોકલવામાં આવ્યા હતાં.
પોલીસે રાંદેરમાં ઝઘડિયા ચોકી નજીકના એક ફ્લેટમાં દરોડા પાડીને લેપટોપ, વિવિધ દેશોના વિઝા સ્ટીકરો અને આશરે રૂ.૧.૩૦ લાખની કિંમતની અન્ય સામગ્રી જપ્ત કરી હતી. લેપટોપ પરની ફાઇલોમાં વિવિધ દેશોના વિઝા સ્ટીકરોનું એડિટિંગ કરાયું હતું.
