કેલિફોર્નિયા હિન્દુ તહેવાર દિવાળીની રજા જાહેર કરનારું અમેરિકાનું ત્રીજુ રાજ્ય બન્યું હતું. આ અંગેની જાહેરાત કરતાં કેલિફોર્નિયાના ગવર્નર ગેવિન ન્યૂસમે જણાવ્યું હતું કે તેઓએ દિવાળીમાં સત્તાવાર રજા જાહેર કરતાં બિલ પર સહી કરી દીધી છે.
દિવાળીને સત્તાવાર રાજકીય રજા જાહેર કરતું ‘AB 268’ નામનું આ બિલ સપ્ટેમ્બરમાં કેલિફોર્નિયા એસેમ્બ્લીના ગૃહોમાંથી સફળતાપૂર્વક પસાર થઈ ગયું હતું, જેના પર ગવર્નરના અંતિમ નિર્ણયની રાહ જોવાઈ રહી હતી.
એસેમ્બ્લી સભ્ય એશ કાલરાએ જણાવ્યું હતું કે, ‘કેલિફોર્નિયા ભારતીય અમેરિકનોની સૌથી મોટી વસ્તી ધરાવતું રાજ્ય છે. દિવાળીને સત્તાવાર રાજ્ય રજા જાહેર કરવાથી લાખો કેલિફોર્નિયાના રહેવાસીઓ આ તહેવારની ઉજવણી કરી શકશે. દિવાળી સદભાવના, શાંતિ અને નવીકરણની સહિયારી ભાવનાના સંદેશ સાથે સમુદાયોને એકસાથે લાવે છે. કેલિફોર્નિયાએ દિવાળી અને તેની વિવિધતાને અપનાવવી જોઈએ, ન કે તેને અંધારામાં છુપાવીને રાખવું જોઈએ.’
આ અગાઉ પેન્સિલ્વેનિયાએ ઑક્ટોબર 2024માં દિવાળીને સત્તાવાર રજા તરીકે માન્યતા આપનારું આ પ્રથમ રાજ્ય બન્યું હતું. આ પછી કનેક્ટિકટને 2025 દિવાળીની રજા જાહેર કરી હતી. ન્યૂયોર્ક સિટીમાં દિવાળીને જાહેર શાળાઓ માટેની રજા તરીકે જાહેર કરવામાં આવી છે, જોકે આ સમગ્ર ન્યૂયોર્ક રાજ્ય માટેની સત્તાવાર ‘સ્ટેટ હોલિડે’ નથી.
સમુદાયના નેતાઓ અને અગ્રણી ઇન્ડિયન અમેરિકન સંગઠનોએ કેલિફોર્નિયાના આ નિર્ણયનું સ્વાગત કર્યું હતું. ‘ઇન્ડિયાસ્પોરા’એ જણાવ્યું હતું કે, આ માન્યતા ન ફક્ત દિવાળીની જીવંતતા દર્શાવે છે, પરંતુ સમગ્ર અમેરિકામાં ભારતીય અમેરિકન સમુદાયના કાયમી પ્રભાવને પણ દર્શાવે છે.
