ગુજરાતી સંગીત જગતમાં પણ આશા ભોસલેએ અનોખી ઓળખ ઉભી કરી હતી. હિન્દી ફિલ્મ સંગીતમાં વિશ્વપ્રસિદ્ધ બન્યા પછી પણ તેમણે પ્રાદેશિક ભાષાઓમાં ખાસ કરીને ગુજરાતી ગીતોમાં પોતાની અવાજની મીઠાશ ભરીને શ્રોતાઓને મંત્રમુગ્ધ કર્યા હતાં. આશાએ ગુજરાતી ભાષામાં લોકગીતો, ગરબા, ભજન અને ફિલ્મી ગીતોમાં પોતાનો સ્વર આપ્યો હતો. ગુજરાતી સિનેમાના સુવર્ણકાળ દરમિયાન આશાએ ઘણા યાદગાર ગીતો ગાયાં હતાં.
આશા ભોસલેએ ગુજરાતી ફિલ્મો અને ગરબાઓમાં અનેક સદાબહાર ગીતો ગાયા હતાં, જેમાં ‘માડી તારું કંકુ ખર્યું’, ‘સોના વાટકડી’, ‘છેલાજી રે’ સૌથી લોકપ્રિય છે. અવિનાશ વ્યાસ અને ગૌરાંગ વ્યાસના સંગીત નિર્દેશનમાં તેમણે ‘મેંહદી તે વાવી માળવે’ જેવા અવિસ્મરણીય ગીતો આપ્યા હતાં. આ ઉપરાંત ‘પાટણ થી પટોળા’, ‘હે રંગલો’, ‘તારા ફળિયા માં પગ નહીં મેલું’, ‘છાનું રે છપનું’, ‘ખમ્મા મારા નંદજીના લાલ’, ‘દૂધે તે ભરી તળાવડી’, ‘દાદા હો દીકરી’ જેવા ગીતો આજે પણ શ્રોતાઓના દિલમાં જીવંત છે.
ગુજરાતી ગરબા અને લોકસંગીતમાં તેમનું યોગદાન ખાસ અનોખુ રહ્યું છે. ફિલ્મી ક્ષેત્રમાં પણ તેમણે ગુજરાતી ફિલ્મો માટે યાદગાર ગીતો ગાયા છે. તેમના સ્વરે અનેક ફિલ્મોને લોકપ્રિય બનાવવામાં મહત્વનો ફાળો આપ્યો છે. સંગીતકારો સાથેની તેમની જોડી હંમેશા સફળ રહી છે અને તેમણે ગુજરાતી સંગીતને નવી ઊંચાઈઓ સુધી પહોંચાડ્યું હતું
આશાનું ગુજરાત સાથે ગાઢ જોડાણ હતું, કારણ કે તેમના માતા ગુજરાતી હતાં. આ કારણે તેઓ પોતાને ‘અડધા ગુજરાતી’ અને ગુજરાતની ‘ભાણીબા’ (ભાણેજ) ગણાવતા હતાં.
