ગુજરાત સરકારે રાજ્યના દૂરના, સરહદી અને પછાત વિસ્તારોમાં સેટેલાઇટ-આધારિત હાઇસ્પીડ ઇન્ટરનેટ કનેક્ટિવિટીમાં પરસ્પર સહયોગ માટે સ્ટારલિંક સાથે લેટર ઓફ ઇન્ટેન્ટ (LoI)ની સોમવારે આપ-લે કરી હતી.
ગાંધીનગરમાં મુખ્યપ્રધાન ભૂપેન્દ્ર પટેલ અને નાયબ મુખ્યપ્રધાન હર્ષ સંઘવીની હાજરીમાં એક કાર્યક્રમમાં ઇલોન મસ્કની સ્પેસએક્સની પેટાકંપની સેટેલાઇટ કોમ્યુનિકેશન્સ પ્રાઇવેટ લિમિટેડ સાથે LoIનું વિનિમય કરાયું હતું. આ કરાર રાજ્યના ઉદ્યોગ કમિશનર પી સ્વરૂપ અને સ્ટારલિંક ઇન્ડિયાના વડા પ્રભાકર જયકુમાર વચ્ચે થયો હતો.
સરકારે સત્તાવાર યાદીમાં જણાવ્યું હતું કે આનો ઉદ્દેશ્ય રાજ્યના દૂરના, સરહદી અને અછતગ્રસ્ત વિસ્તારોમાં હાઇ-સ્પીડ સેટેલાઇટ-આધારિત ઇન્ટરનેટ કનેક્ટિવિટી પૂરી પાડવાનો છે જ્યાં હાલમાં મર્યાદિત ટેલિકોમ ઇન્ફ્રાસ્ટ્રક્ચર છે. આ હિલચાલ ડિજિટલ કનેક્ટિવિટી મિશન અને અન્ય વ્યૂહાત્મક પહેલનો એક ભાગ છે. આ LoIના પાયલોટ પ્રોજેક્ટ હેઠળ કોમન સર્વિસ સેન્ટર્સ (CSC), ઈ-ગવર્નન્સ ફેસિલિટી, સરકારી શાળાઓ, ડિસ્ટ્રિક્ટ ડિઝાસ્ટર મેનેજમેન્ટ કંટ્રોલ રૂમ્સ, બંદરો અને વન્યજીવન અભયારણ્ય પ્રદેશોને હાઇસ્પીડ કનેક્ટિવિટી પૂરી પાડવાની યોજના છે. આ પ્રોજેક્ટનો ઉદ્દેશ્ય નર્મદા અને દાહોદ સહિત આદિવાસી જિલ્લાઓને ડિજિટલ મિશનમાં આવરી લેવાનો છે.
સરકારના જણાવ્યા મુજબ આ પ્રોજેક્ટ હેઠળ શિક્ષણ માટે સરકારી શાળાઓમાં સ્માર્ટ કનેક્ટિવિટી ઉપલબ્ધ બનશે, જ્યારે પ્રાથમિક આરોગ્ય કેન્દ્રોમાં હેલ્થકેર અને ટેલિમેડિસન સર્વિસ સરળતાથી ઉપલબ્ધ બનશે. વધુમાં ભવિષ્યમાં વિવિધ સરકારી એજન્સીઓ, વિભાગો, શાળાઓ અને આપત્તિ પ્રતિભાવ ટીમોના ક્ષમતા નિર્માણ માટે સંયુક્ત તાલીમ કાર્યક્રમોનું આયોજન કરાશે
