ગુજરાત ઇન્ટરનેશનલ ફાયનાન્સિયલ ટેક સિટી (ગિફ્ટ સિટી)ના ચેરમેન તરીકે ખાનગી ક્ષેત્રે જાણીતી કોટક બેંકના સ્થાપક તથા ઉદ્યોગપતિ, નીતિ અને ફાયનાન્સિયલ બાબતોના નિષ્ણાત ઉદય કોટકની ગુજરાત સરકારે તાત્કાલિક અસરથી નિમણૂક કરી છે. તેઓ મુખ્ય પ્રધાનના આર્થિક સલાહકાર અને પૂર્વ કેન્દ્રીય નાણા સચિવ હસમુખ અઢીયાનું સ્થાન લેશે. જૂન ૨૦૨૩માં અઢીયાની ચેરમેન તરીકે નિમણૂક કરી હતી. હવે ગિફ્ટ સિટીને વૈશ્વિક સ્તરે વધુ સક્રિય કરવા તેમજ તેની એક આગવી ઓળખ ઊભી કરવાના પ્રયાસોના ભાગરૂપે ઉદય કોટકને જવાબદારી સોંપાઇ છે.
વડાપ્રધાન નરેન્દ્ર મોદી ગુજરાતના મુખ્યમંત્રી હતા ત્યારે ગાંધીનગરની નજીક એક વૈશ્વિક આર્થિક હબ ઊભું કરવાની પહેલ કરી હતી. આજે આ ગિફ્ટ સિટી અનેક વૈશ્વિક બેંકિંગ, સ્ટોક એક્સચેન્જ, આર્થિક તેમજ ડેટા સેન્ટરો માટેનું એક હબ બની ગયું છે. અત્યાર સુધી ગુજરાત સરકાર દ્વારા ગિફ્ટ સિટીના ગવર્નિંગ બોર્ડમાં નિવૃત્ત સનદી અધિકારી અને પૂર્વ મુખ્યસચિવ સુધીર માંકડને ચેરમેન તરીકે જવાબદારી સોંપી હતી. જૂન ૨૦૨૩માં મુખ્ય પ્રધાનના સલાહકાર એવા ડો.હસમુખ અઢીયા નોન એક્ઝિક્યુટિવ ચેરમેન તરીકે કામ સંભાળતા હતા. કોટકની ચેરમેન તરીકેની અન્ય બાબતો હવે પછી નક્કી કરાશે. તેઓ નવો ઓર્ડર ન થાય ત્યાં સુધી આ પદે યથાવત રહેશે, તેમ શહેરી વિકાસ અને શહેરી ગૃહ નિર્માણ વિભાગના ઓર્ડરમાં જણાવાયું છે.
મુંબઇમાં જન્મેલા ઉદય સુરેશ કોટક કપાસ પકવતા ગુજરાતી કુટુંબમાં ઉછર્યા હતા. ત્યારે તેઓ ૬૦ સભ્યોના સંયુક્ત પરિવારમાં રહી મુંબઇમાં જ એમબીએ સુધીનો અભ્યાસ કર્યો હતો. ૨૬મા વર્ષે તેમણે કોટક કેપિટલ મેનેજમેન્ટ ફાયનાન્સ લિમિટેડની સ્થાપના કરી હતી. ૨૦૦૩માં રિઝર્વ બેંકે દેશની પ્રથમ એવી નોન બેંકિંગ ફાયનાન્સ કંપની (એનબીએફસી)ને ખાનગી ક્ષેત્રે બેંક શરૂ કરવા માટે લાઈસન્સ આપ્યું હતું, જેના પગલે કોટક મહિન્દ્રા બેંકની સ્થાપના થઇ હતી.
