કેનેડામાં આ વર્ષે નોન પરમેનન્ટ રેસિડેન્ટ્સ (NPR)ની સંખ્યામાં ઘટાડો થવાને કારણે દેશની વસ્તી સ્થિર રહે તેવી શક્યતા છે. આ સ્થિતિને કારણે નજીકના ભવિષ્યમાં ફક્ત તેમાં સાધારણ વધારો થશે તેવું જણાય છે. વસ્તી વિષયક આ સંભાવના 26 ફેબ્રુઆરીએ દેશના પાર્લામેન્ટરી બજેટ ઓફિસર (PBO) દ્વારા રજૂ કરાયેલા રીપોર્ટમાં વ્યક્ત કરવામાં આવી હતી. રીપોર્ટમાં વધુમાં જણાવ્યા મુજબ, ‘NPR લોકોમાં ઘટાડા સાથે, PBOનો અંદાજ છે કે 2026માં કેનેડાની કુલ વસ્તી સ્થિર રહેશે. 2027માં વસ્તીમાં ફક્ત 0.3 ટકા સુધીનો સામાન્ય વધારો થવાનું અનુમાન છે, જે મીડિયમ ટર્મમાં વાર્ષિક 0.8 ટકા પર સ્થિર રહેશે, જે 2015 પહેલા તેની વાર્ષિક સરેરાશના 1.1 ટકા કરતાં ઓછી છે’
આ અંગેના નવા અંદાજમાં એવી ધારણા વ્યક્ત કરવામાં આવી હતી કે, કેનેડામાં NPRની સંખ્યા, જે 2024 પછીથી ઘટી રહી છે, તેમાં ‘તીવ્ર ઘટાડો જોવા મળશે’. NPRમાં વિદેશી વિદ્યાર્થીઓ, હંગામી વિદેશી વર્કર્સ, આશ્રય ઇચ્છનારાઓ અને મુલાકાતીઓ વગેરેનો સમાવેશ થાય છે. રીપોર્ટમાં વધુમાં જણાવ્યું હતું કે, જ્યારે 2024માં દેશની વસ્તીમાં NPRની સંખ્યા 7.6 ટકા નોંધાઇ હતી, ત્યારે તે 2027માં પાંચ ટકાથી ઓછી થવાનું અનુમાન છે, અને કેનેડિયન સરકાર પણ તે લક્ષ્યાંક ઇચ્છે છે. રીપોર્ટમાં ઉલ્લેખ કરવામાં આવ્યો હતો કે, 1972 અને 2015 વચ્ચે, દેશની વસ્તી સ્થિર દરે વધી હતી, જેની વાર્ષિક સરેરાશ 1.1 ટકા હતી. જોકે, સમય જતાં તેમાં વધારો થવાના સંજોગો બદલાયા અને તાજેતરના વર્ષોમાં, તેમાં ઇમિગ્રેશનની મહત્ત્વપૂર્ણ અસર જોવા મળી હતી.
