અમેરિકન વાઇસ પ્રેસિડેન્ટ જેડી વાન્સે કન્ઝર્વેટિવ્ઝને વિભાજીત કરનારા વિવાદાસ્પદ ઇન્ટરવ્યૂની પ્રશંસા કર્યા પછી કેટલાક MAGA સમર્થકોએ તેમની સામે વિરોધ દર્શાવ્યો હતો. જેડી વાન્સે 26 ફેબ્રુઆરીએ ધ વોશિંગ્ટન પોસ્ટ સાથેની ચર્ચામાં ફોક્સ ન્યૂઝના ભૂતપૂર્વ હોસ્ટ ટકર કાર્લસન અને ઇઝરાયલમાં અમેરિકન એમ્બેસેડર માઇક હુકાબી વચ્ચેના તાજેતરના ઇન્ટરવ્યૂ અંગે પોતાના વિચારો વ્યક્ત કર્યા હતા. આ ઇન્ટરવ્યૂના કારણે MAGAના સમર્થકોમાં ઉગ્ર રોષ વ્યાપ્યો હતો, અને ઓછામાં ઓછા 14 દેશ દ્વારા તેની ટીકા થઈ હતી. વાન્સે જણાવ્યું હતું કે, ‘આ અંગે હું માનું છું કે મારો નિર્ણય એ છે કે તે ખરેખર સારી ચર્ચા છે, જે જમણેરીઓ માટે આવશ્યક રહેશે, તે ફક્ત આવનારા બે વર્ષ માટે જ નહીં, પરંતુ લાંબા ભવિષ્ય સુધી રહેશે.’ તેમણે એ પણ જણાવ્યું હતું કે, તેમણે આખો ઇન્ટરવ્યૂ જોયો નથી પરંતુ ‘બે ક્લિપ્સ જોઈ હતી.’ વાન્સના નિવેદનની સામે કેટલાક કન્ઝર્વેટિવ્ઝે તાત્કાલિક ટીકા કરી હતી.
