અમેરિકા-ઇઝરાયેલના સંયુક્ત હવાઇ હુમલમાં ઈરાનના સુપ્રીમ લીડર અયાતુલ્લા અલી ખામેનીના મોતના પછી પાકિસ્તાનના કરાચીમાં અમેરિકન કોન્સ્યુલેટની બહાર બહાર ઉગ્ર દેખાવો થયા હતાં. ટોળું કોન્સ્યુલેટમાં ધુસી ગયું હતું અને તે પછી સુરક્ષા દળો સાથેની અથડામણમાં ઓછામાં ઓછા 12 લોકોના મોત થયા હતાં અને અનેક ઘાયલ થયા હતાં. ટોળાએ અમેરિકન દૂતાવાસમાં ભારે તોડફોડ કરી હતી અને આગચંપીની ઘટના પણ બની હતી.
ઇરાકની રાજધાની બગદાદમાં ગ્રીન ઝોનની બહાર અમેરિકી દૂતાવાસની બહાર સેંકડો લોકોએ વિરોધી દેખાવો કર્યા હતાં. ટોળાને વિખેરી નાંખવા માટે ઈરાકી પોલીસે ટીયર ગેસ અને સ્ટન ગ્રેનેડ છોડ્યા હતાં. દેખાવકારોએ ખામેનીના ફોટા પકડીને ઇઝરાયેલ અને અમેરિકા વિરોધી નારા લગાવ્યા હતાં. ઈરાન પછી પાકિસ્તાન અને ઇરાકમાં શિયા મુસ્લિમોની વસ્તી સૌથી વધુ છે.
કરાચીમાં સ્થાનિક સરકારના પ્રવક્તાએ જણાવ્યું હતું કે યુએસ કોન્સ્યુલેટના મુખ્ય દરવાજાની બહાર એક વાહનને આગ ચાંપી દેવાયા બાદ અને પોલીસ સાથે અથડામણ થયા બાદ દેખાવકારોને વિખેરી નાંખવામાં આવ્યાં હતાં. પોલીસે જણાવ્યું હતું કે ઓછામાં ઓછા 12 લોકોના મોત થયા હતાં. પોલીસે દેખાવકારો સામે ટીયરગેસ છોડ્યાં હતા અને ફાયરિંગ પણ કર્યું હતું. પાકિસ્તાનના અન્ય ભાગોમાં પણ મોટા વિરોધ પ્રદર્શનો થયા હતાં.
સંયુક્ત રાષ્ટ્ર કાર્યાલયની ઇમારતને આગને હવાલે
સામાન્ય રીતે શાંતિપૂર્ણ શિયા બહુમતી ધરાવતા ગિલગિટ બાલ્ટિસ્તાન ક્ષેત્રમાં સ્કાર્ડુ શહેમાં દેખાવકારોએ સંયુક્ત રાષ્ટ્ર કાર્યાલયની ઇમારતને આગ ચાંપી દીધી હતી. સ્થાનિક સરકારના પ્રવક્તા શબ્બીર મીરે રોઇટર્સને જણાવ્યું હતું કે, “જીબીમાં યુએન ઓફિસની બહાર મોટી સંખ્યામાં વિરોધીઓ એકઠા થયા હતા અને ઇમારતને બાળી નાખી હતી. જોકે કોઈ જાનહાનિ થઈ નથી.
લાહોરમાં પણ દિવસની શરૂઆતમાં, સેંકડો દેખાવકારો યુએસ કોન્સ્યુલેટની બહાર એકઠા થયા હતાં. પોલીસ સાથે કેટલીક નાની અથડામણો થઈ હતી પરંતુ હિંસાના કોઈ અહેવાલ નથી. કેટલાક દેખાવકારોએ કોન્સ્યુલેટથી સેંકડો યાર્ડ દૂર સુરક્ષા ગેટને નુકસાન પહોંચાડવાનો પ્રયાસ કર્યો હતો. જોકે, પોલીસે બળપ્રયોગ કર્યા વગર તેમને અટકાવ્યા હતાં.
પોલીસે જણાવ્યું હતું કે રાજધાની ઇસ્લામાબાદમાં રેડ ઝોન તરફ જતા તમામ રસ્તાઓ પર ટ્રાફિક માટે બંધ કરાયો હતો. આ વિસ્તારમાં રાજદ્વારી મિશન અને સંસદ છે
