અમેરિકા અને ઇઝરાયેલના હુમલા પછી ઇરાનને પણ મધ્યપૂર્વના દેશોમાં મિસાઇલ-ડ્રોન હુમલા કરતાં વિશ્વના સૌથી વ્યસ્ત આંતરરાષ્ટ્રીય પ્રવાસન કેન્દ્ર દુબઈ સહિત મધ્યપૂર્વના મુખ્ય એરપોર્ટ બંધ કરી દેવામાં આવ્યા હતાં. આનાથી 28 ફેબ્રુઆરી અને પહેલી માર્ચે હજારો ફ્લાઇટ્સ રદ કરાઈ હતી. ભારત-પાકિસ્તાન તથા યુરોપ અને મધ્ય પૂર્વની એરલાઇન્સે તેમની મોટાભાગની ફ્લાઇટ્સ રદ કરી હતી.
ભારતની એરલાઇન્સોએ રવિવારે 444 ઇન્ટરનેશનલ ફ્લાઇટ્સ રદ કરી હોવાનું માનવામાં આવે છે. ભારતના નાગરિક ઉડ્ડયન મંત્રાલયે જણાવ્યું હતું કે ઈરાન અને મધ્ય પૂર્વના દેશોમાં પર એરસ્પેસના પ્રતિબંધોને કારણે,28 ફેબ્રુઆરીના રોજ સ્થાનિક વિમાન કંપનીઓની 410 ફ્લાઇટ્સ રદ કરી હતી અને 1 માર્ચના રોજ 444 ફ્લાઇટ્સ રદ થવાની ધારણા છે.
શનિવારથી પાકિસ્તાનથી પશ્ચિમ એશિયા જતી વિવિધ એરલાઇન્સની ઓછામાં ઓછી 184 આંતરરાષ્ટ્રીય ફ્લાઇટ્સ રદ કરાઈ હતી. નાગરિક ઉડ્ડયન સત્તામંડળના પ્રવક્તાએ પુષ્ટિ આપી હતી કે ઇસ્લામાબાદ, લાહોર, કરાચી, ક્વેટા, સિયાલકોટ, પેશાવર, ફૈસલાબાદથી દુબઈ, અબુ ધાબી, દોહા, મસ્કત, શારજાહ, રિયાધ, જેદ્દાહ જતી ફ્લાઇટ્સ રદ કરાઈ હતી.
દરરોજ 1,000થી વધુ ફ્લાઇટસનું સંચાલન કરતાં દુબઈના આંતરરાષ્ટ્રીય વિમાનમથકને ઇરાની હુમલામાં નુકસાન થયું હતું. અબુ ધાબી અને કુવૈતના આંતરરાષ્ટ્રીય વિમાનમથકોને પણ નુકસાન થયું હતું. મધ્ય પૂર્વના દેશોએ તેમની એરસ્પેસ બંધ કરી દેતા દુબઈ, દોહા અને અબુ ધાબી સહિતના મુખ્ય પ્રાદેશિક પ્રવેશદ્વારો બંધ કરાયા હતાં. ફ્લાઇટ નકશામાં ઈરાન, ઇરાક, કુવૈત, ઇઝરાયલ અને બહેરીનનું આકાશ લગભગ ખાલી દેખાતું હતું, જ્યારે યુરોપ અને મધ્ય પૂર્વની એરલાઇન્સે મોટા પાયે ફ્લાઇટ્સ રદ કરવાની જાહેરાત કરી હતી.
પૂર્વ પશ્ચિમના દેશમાં એર ટ્રાવેલ માટે દુબઈ અને દોહા હબ ગયા છે. અહીં યુરોપ અને એશિયા માટેની મોટાભાગની લાંબા અંતરની ફ્લાઇટ્સ પસાર થતી હોય છે. આ દેશોના એરપોર્ટ લાંબા સમય સુધી શટડાઉન રહેશે તો વિશ્વભરની એરલાઇન્સને તેમની સેવા રદ કરવાની કે રૂટ બદલવાની ફરજ પડી શકે છે. દુબઈ એરપોર્ટે દુબઈ ઈન્ટરનેશનલ અને અલ મક્તૂમ ઈન્ટરનેશનલની બધી ફ્લાઈટ્સ આગામી સૂચના સુધી સ્થગિત કરી દીધી હતી અને મુસાફરોને મુસાફરી ન કરવા વિનંતી કરી હતી.
સિરિયમના પ્રારંભિક ડેટા અનુસાર, યુનાઇટેડ સ્ટેટ્સ અને ઇઝરાયલે ઇરાન પર હુમલા શરૂ કર્યા પછી, એરલાઇન્સે શનિવારે કતાર અને ઇઝરાયલની લગભગ અડધી ફ્લાઇટ્સ અને કુવૈતની લગભગ 28% ફ્લાઇટ્સ રદ કરી હતી. ડેટા દર્શાવે છે કે, મધ્ય પૂર્વની લગભગ 24% ફ્લાઇટ્સ રદ કરાઈ હતી.
