વિશ્વ ક્રિકેટમાં કદાચ આ પ્રકારના પહેલા કિસ્સામાં પાકિસ્તાન ક્રિકેટ બોર્ડે ટી-20 વર્લ્ડ કપમાં ટીમના કંગાળ દેખાવ, ધબડકા બદલ દરેક ખેલાડીને પાકિસ્તાની રૂપિયા 50 લાખનો દંડ ફટકાર્યો છે.
ભારતીય મીડિયાએ પાકિસ્તાની અખબાર ધ એક્સપ્રેસ ટ્રિબ્યુનના અહેવાલને ટાંકીને આપેલા અહેવાલો મુજબ પાકિસ્તાન ક્રિકેટ બોર્ડના અધિકારીઓએ ટી-20 વર્લ્ડ કપમાં ટીમના નબળા દેખાવ અને ખાસ તો ભારત સામેના પરાજય પછી ટીમને દંડ ફટકારવાનો નિર્ણય તો લઈ લીધો હતો. તેમાંય ટીમ સેમિફાઈનલમાં પહોંચી શકી નહીં તેના કારણે બોર્ડના અધિકારીઓ વધારે ગિન્નાયા હતા અને એવો આદેશ કર્યો હતો કે, ક્રિકેટરોને હવે પછી તેમના દેખાવના આધારે જ આર્થિક વળતર મળી શકશે.
પીસીબીએ કહ્યું હતું કે, ખેલાડીઓને સારા દેખાવ બદલ પુરસ્કાર મળે છે, તો હવેથી નબળા દેખાવ બદલ સજા પણ થશે.
ભારતની જેમ જ પાકિસ્તાનમાં પણ ક્રિકેટરોનું ચાર કેટેગરીમાં વર્ગીકરણ થાય છે અને દરેક ખેલાડીને તેની કેટેગરીના આધારે વાર્ષિક કોન્ટ્રાક્ટ મુજબ વળતર મળે છે. પણ હવે તમામને એક સરખો, રૂ. 50 લાખ દંડ કરાયો છે.
