ફ્રાન્સના પ્રેસિડન્ટ ઇમેન્યુઅલ મેક્રોન અને ઓસ્ટ્રેલિયાના વડાપ્રધાન એન્થોની અલ્બેનીઝ સહિતના વૈશ્વિક નેતાઓએ હોળીની શુભેચ્છા પાઠવી હતી. મેક્રોનને વડા પ્રધાન નરેન્દ્ર મોદીને હોળીની શુભેચ્છાઓ પાઠવી હતી. હોળી પર્વ નિમિત્તે X પર પીએમ મોદીની પોસ્ટનો જવાબ આપતા મેક્રોને હિન્દીમાં કહ્યું હતું કે “હેપ્પી હોળી, મારા મિત્ર!”
મોદીએ પોતાની શુભેચ્છાઓ વ્યક્ત કરતા કહ્યું હતું કે હોળીનો તહેવાર સમગ્ર વાતાવરણને નવી ઉર્જાથી ભરે છે. આ ઉજવણીની તે જ મહાન વિશેષતા છે. જે રીતે આનંદના રંગો બધે ફેલાય છે, બધી બાજુઓ પર દેખાય છે, તેમ દરેકને ઉલ્લાસ અને આનંદ છવાઈ જાય છે.
બીજી તરફ ભારતમાં યુએસના રાજદૂત, સર્જિયો ગોરે બુધવારે બોચાસણવાસી શ્રી અક્ષર પુરુષોત્તમ સ્વામિનારાયણ સંસ્થા અક્ષરધામ મંદિરની મુલાકાત લીધી હતી. X પરની એક પોસ્ટમાં તેમણે જણાવ્યું હતું કે “હોળીના અવસરે એક શ્રેષ્ઠ મુલાકાત. ડેપ્યુટી સેક્રેટરી ઓફ સ્ટેટ ક્રિસ્ટોફર લેન્ડૌ અને યુએસ સ્પેસ કમાન્ડ જનરલ વ્હાઇટિંગ સાથે BAPS સ્વામિનારાયણ અક્ષરધામ મંદિરની મુલાકાત લીધી. આ અસાધારણ મંદિર ભારતના આધ્યાત્મિક વારસા અને કાયમી મૂલ્યોનું પ્રદર્શન કરે છે. દરેકને હોળીની ખૂબ ખૂબ શુભેચ્છાઓ!”
ભારતમાં ફિનલેન્ડ અને જાપાનના દૂતાવાસે પણ મુંબઈ અને દિલ્હીમાં હોળીની ઉજવણી કરી હતી ઓસ્ટ્રેલિયાના વડા પ્રધાન એન્થોની અલ્બેનીઝે બુધવારે પોતાના નિવેદનમાં હોળીની શુભેચ્છાઓ પાઠવી હતી અને કહ્યું હતું કે હોળી એ સહિયારા ઇતિહાસ, વારસો અને પરંપરાઓની ઉજવણીમાં સાથે આવવાનો સમય છે.
