અમેરિકામાં ઈમિગ્રેશન (ઇમિગ્રેશન એન્ડ કસ્ટમ્સ એન્ફોર્સમેન્ટ – ICE) ની કાર્યવાહી અવારનવાર માત્ર ‘લેટિનક્સ’ સમુદાય અથવા સરહદની સમસ્યા તરીકે જોવાય છે. દક્ષિણ એશિયન સમુદાયના ઘણા લોકો એવું માને છે કે આ સમસ્યા તેમને અસર કરતી નથી. ઘણાને લાગે છે કે દક્ષિણ એશિયન પરિવારો ‘કાયદેસર’ આવ્યા છે, તેમના વિઝા તેમને સુરક્ષિત રાખે છે અને દેશનિકાલ – ડીપોર્ટેશનનું જોખમ અન્ય સમુદાયો માટે જ છે. પરંતુ વાસ્તવિકતા આ માન્યતા કરતા ઘણી અલગ છે.
UCLA એશિયન અમેરિકન સ્ટડીઝ સેન્ટર અને UCLA સેન્ટર ફોર નેબરહુડ નોલેજના તાજેતરના સંશોધન મુજબ, ૨૦૨૫માં એશિયનોની ICE ધરપકડમાં લગભગ ત્રણ ગણો વધારો થયો છે. તેમાં ભારતથી આવેલા ઇમિગ્રન્ટ્સનો આ ધરપકડોમાં ૨૫%થી વધુનો હિસ્સો છે. માત્ર કેલિફોર્નિયામાં જ એશિયન ઇમિગ્રન્ટ્સની ધરપકડના 20% કેસ નોંધાયા છે.
આ આંકડા માત્ર કાગળ પર નથી; તે આપણા પાડોશીઓ, સહકર્મીઓ, સહપાઠીઓ અને સમુદાયના સભ્યો છે. ફેડરલ ઈમિગ્રેશનના નિવેદનોમાં વારંવાર એવી દલીલ કરાય છે કે આ કાર્યવાહી માત્ર ગુનેગારોને લક્ષ્ય બનાવે છે. જોકે, કેટો (Cato) ઇન્સ્ટિટ્યૂટના ૨૦૨૫ના વિશ્લેષણ મુજબ, ICEની કસ્ટડીમાં રહેલા આશરે ૭૩% લોકો સામે કોઈપણ પ્રકારના ફોજદારી ગુના નોંધાયેલા નથી. આ લોકો ગુનાખોરીને કારણે નહીં, પરંતુ માત્ર ડોક્યુમેન્ટેશનના અભાવ અથવા જટિલ કાનૂની પ્રક્રિયામાં ફસાવાને કારણે અટકાયતમાં છે.
ઈમિગ્રેશન અમલીકરણની નીતિઓ ગંભીર ગુનાઓને બદલે નાગરિક સ્થિતિ પર ધ્યાન કેન્દ્રિત કરે છે, ત્યારે તેનાથી સામાન્ય ઇમિગ્રન્ટ્સનું જીવન પ્રભાવિત થાય છે. કેલિફોર્નિયાના આર્ટેસિયામાં એક કાર-વોશ પર કામ કરતા લોકો ICEના ડરને કારણે રેલીમાં ભાગ લઈ શક્યા નહોતા.
આ પરિસ્થિતિ જોતા, ૨૧ ફેબ્રુઆરી, ૨૦૨૬ ના રોજ ‘સાઉથ એશિયન નેટવર્ક’ દ્વારા “ICE આઉટ ઓફ આર્ટેસિયા” રેલીનું આયોજન કરાયું હતું. તેમાં માત્ર શારીરિક હાજરી જ નહીં, પરંતુ ૪૦૦થી વધુ લોકો ઓનલાઇન જોડાયા હતા, જે સાબિત કરે છે કે આ સમુદાયમાં ભયનો માહોલ ફરી વળ્યો છે.
ICEની કાર્યવાહીની અસર માત્ર ઇમિગ્રેશન પુરતી મર્યાદિત નથી; તેની અસર સ્વાસ્થ્ય, શિક્ષણ અને રોજગારના અધિકારો ઉપર પણ પડે છે. તે ઇમિગ્રન્ટ્સમાં માનસિક આઘાત અને ડર પેદા કરે છે.
આ પરિસ્થિતિમાં એકતા, શિક્ષણ અને સામૂહિક પ્રતિભાવની જરૂર છે. સમુદાયના સંગઠનો, ધાર્મિક જૂથો અને શાળાઓએ એ સ્વીકારવું પડશે કે ઇમિગ્રેશન અમલીકરણ કોઈ એક ભૌગોલિક વિસ્તાર કે સમુદાય પુરતો મર્યાદિત નથી.
