કેનેડાના ઓન્ટારિયો પ્રાંતના એસેક્સ કાઉન્ટીના લાસેલ શહેરમાં 3 માર્ચે પંજાબી મૂળની સોશિયલ મીડિયા ઇન્ફ્લુએન્સર અને યુટ્યુબર નેન્સી ગ્રેવાલની હત્યા કરાઈ હતી. 45 વર્ષીય નેન્સી ગ્રેવાલની અજાણ્યા શખસે તેના ઘરમાં ઘૂસીને છરીના ઘા માર્યા હતા.ગુરુવારે જાલંધરમાં તેની માતાએ દાવો કર્યો હતો કે નેન્સીને વારંવાર જીવલેણ હુમલાની ધમકીઓ મળતી હતી.
પોલીસે જણાવ્યું હતું કે મૃતકની ઓળખ વિન્ડસરની નેન્સી ગ્રેવાલ તરીકે થઈ હતી. પોલીસને માહિતી મળી હતી કે કોઈ વ્યક્તિએ વિન્ડસર વિસ્તારમાં નેન્સી ગ્રેવાલના ઘરમાં ઘૂસીને તેના પર છરીથી હુમલો કર્યો હતો અને ગંભીર ઈજા પહોંચાડીને ભાગી ગયો હતો. ઘટનાની માહિતી મળતાં જ પોલીસ અને ઇમરજન્સી સર્વિસની ટીમો ઘટનાસ્થળે પહોંચી ગઈ હતી. નેન્સી ગ્રેવાલને ઘાયલ હાલતમાં તાત્કાલિક હોસ્પિટલમાં લઈ જવામાં આવી હતી, પરંતુ ડોકટરો તેને બચાવી ના શક્યા અને સારવાર દરમિયાન તેનું મોત નીપજ્યું હતું.
કેનેડિયન પોલીસ અધિકારી માઈકલ પિયર્સે કહ્યું હતું કે, પોલીસ સંપૂર્ણ તપાસ કરી રહી છે. હુમલાખોરની શોધ ચાલુ છે અને ઘટના પાછળનો હેતુ શોધવાના પ્રયાસો કરવામાં આવી રહ્યા છે.
નેન્સી ભારતીય મૂળની સોશિયલ મીડિયા ઇન્ફ્લુએન્સર અને યુટ્યુબર હતી. તેને તેના સોશિયલ મીડિયા પ્લેટફોર્મ પર પંજાબ સંબંધિત સામાજિક, ધાર્મિક અને રાજકીય મુદ્દાઓ પર ખુલ્લેઆમ પોતાના વિચારો વ્યક્ત કર્યા હતા. તેના વિડીયો ખૂબ જ ફેમસ હતા અને તેના ફોલોઅર્સ પણ મોટા પ્રમાણમાં હતા.
નેન્સી ગ્રેવાલ તેના વિડીયોમાં ખાલિસ્તાની પ્રવૃત્તિઓ અને કટ્ટરપંથી વિચારધારાની ટીકા કરતી હતી. પરિણામે, તેની હત્યા અંગે અનેક શંકાઓ ઉભી થઈ રહી છે. જોકે પોલીસે હજુ સુધી કોઈ ચોક્કસ ખૂણાની પુષ્ટિ કરી નથી અને તમામ સંભવિત પાસાઓની તપાસ કરી રહી છે
