રાણા સમાજ યુએસએ દ્વારા ન્યુ જર્સીના ફોર્ડ્સમાં આવેલ લોકપ્રિય બેન્ક્વેટ રોયલ આલ્બર્ટ પેલેસ ખાતે સંસ્થાના સભ્યો અને પરિવારો માટે વેલેન્ટાઇન ડે ઉત્સવનું શાનદાર આયોજન કરવામાં આવ્યું હતું.
સાંજની શરૂઆત પરંપરાગત ગણેશ સ્તુતિ પ્રાર્થના સાથે થઈ હતી. ત્યારબાદ સંસ્થાના પ્રમુખ ભરતભાઈ રાણાએ વક્તવ્ય આપ્યું હતું અને એક્ઝિક્યુટિવ ટીમ અને બોર્ડ સભ્યોનો પરિચય કરાવ્યો હતો. આ પ્રસંગે સંસ્થા દ્વારા પ્રથમ ઉપપ્રમુખ કલ્પેશ વી. રાણા, દ્વિતીય ઉપપ્રમુખ ધર્મેશ રાણા, ખજાનચી ભૂપેન્દ્ર રાણા, સેક્રેટરી હેમા રાણા અને ટ્રસ્ટી રાજ રાણા અને હેમંત રાણાનું સન્માન કરાયું હતું.
આ પ્રસંગે ખાસ મહેમાનો અને પ્રાયોજકો સર્વશ્રી 132-સ્ટોર ડંકિન ફ્રેન્ચાઇઝ નેટવર્કના સીઈઓ આનંદભાઈ પટેલ; પરમ હેલ્થ કેર અને પરમ ફૂડના સીઈઓ વિપુલ અમીન; ડૉ. જયેશ પટેલ; અને સબવે ફ્રેન્ચાઇઝના માલિકો શીલા અને મહેશ દુબાલ ખાસ ઉપસ્થિત રહ્યા હતા.
આ પ્રસંગે વક્તાઓએ સમુદાયના બંધનોને મજબૂત બનાવવા અને સાંસ્કૃતિક જોડાણને પ્રોત્સાહન આપવા માટે રાણા સમાજ યુએસએની લીડરશીપ ટીમના સતત પ્રયાસો બદલ પ્રશંસા કરી હતી.
કાર્યક્રમમાં ઔપચારિક રાત્રિભોજન, સંગીત અને નૃત્ય ઉપરાંત પરંપરાગત ગરબા અને યુગલોના પરફોર્મન્સનો સમાવેશ થયો હતો. મહેમાનોનું રેડ-કાર્પેટ સ્વાગત કરવામાં આવ્યું હતું અને સૌએ ફોટો બૂથનો અનુભવ માણ્યો હતો.
આ પ્રસંગે સંસ્થાના પ્રમુખ ભરતભાઇ રાણાએ જણાવ્યું હતું કે આ ઉજવણી સંસ્થાના પ્રેમ, એકતા અને આદરના મુખ્ય મૂલ્યોને પ્રતિબિંબિત કરે છે. રાણા સમાજ યુએસએના નેતાઓએ ઉમેર્યું હતું કે જૂથ ન્યુ જર્સી અને તેનાથી આગળના સભ્યો વચ્ચે જોડાણને પ્રોત્સાહન આપવા અને વારસાને જાળવવાના હેતુથી વધુ સાંસ્કૃતિક અને સામાજિક મેળાવડાઓનું આયોજન કરવાની યોજના ધરાવે છે.
