વિશ્વભરમાં બાળકોના શિક્ષણ અને ખોરાક સહિત યુકે અને આંતરરાષ્ટ્રીય સેવા પ્રોજેક્ટ્સને ટેકો આપવા માટે ‘સેવા દિવસ’ દરમિયાન શિશુકુંજના હોલમાં યોજાયેલા ભજન કાર્યક્રમમાં ભક્તિ, સેવા અને સકારાત્મક ઉર્જાનું વાતાવરણ છવાઈ ગયું હતું. ખૂબ જ જરૂરી ભંડોળ એકત્ર કરવા માટે યોજાયેલા ભજન અને ભોજન શોમાં નિતુબેન અને બેન્ડે ભજન કિર્તનો રજૂ કર્યા હતા.
આ કાર્યક્રમમાં સવારે 11થી 1 અને ફરીથી સાંજે 4 થી 6 વાગ્યા સુધી બે લાઇવ ભજન સેશન્સ યોજાયા હતા જેને કારણે ભક્તોને પોતાના અનુકુળ સમયે પ્રાર્થના અને ચિંતનમાં ભાગ લેવાની તક મળી હતી. શ્રોતાઓ ઉત્સાહથી ભજન ગાવામાં જોડાયા હતા અને સખાવતી કાર્યને ટેકો આપ્યો હતો.
સંસ્થાના સ્વયંસેવકોની સેનાએ પડદા પાછળ અથાક મહેનત કરી હતી અને મહેમાનોના સ્વાગત, વ્યવસ્થા, સંભાળનું સંચાલન કર્યું હતું. સૌ માટે સ્વાદિષ્ટ ભોજન પરિસરમાં જ પ્રેમથી તૈયાર કરવામાં આવ્યું હતું. કાર્યક્રમે ઉપસ્થિત સૌ વચ્ચેના સંબંધોને મજબૂત બનાવ્યા હતા અને વિશ્વભરમાં બાળકોના કલ્યાણ, શિક્ષણ અને ખાદ્ય કાર્યક્રમોને ટેકો આપવા માટે સમુદાયની પ્રતિબદ્ધતાને પણ પુનઃપુષ્ટિ કરી હતી.
આ પ્રસંગે સેવા યુકેના સત્કાર્યો માટે £1,402 એકત્ર કરાયા હતા.
