યુદ્ધના માહોલ વચ્ચે ચીને ગુરુવારે તેના ડિફેન્સ બજેટને 10 ટકા વધારીને 275 અબજ ડોલર કર્યું હતું, જે ગયા વર્ષની સરખામણીમાં 25 અબજ ડોલરનો વધારો દર્શાવે છે. ચીનનો આ સંરક્ષણ ખર્ચ અમેરિકા પછી વિશ્વમાં બીજા ક્રમે છે અને તેમાં વર્ષોથી વધારો થઈ રહ્યો છે.
ચીનના વડા પ્રધાન લી કિયાંગે ગુરુવારે નેશનલ પીપલ્સ કોંગ્રેસ (NPC) સમક્ષ રજૂ કરાયેલા તેમના અહેવાલમાં જાહેરાત કરી હતી કે રાષ્ટ્રીય સંરક્ષણ માટે આશરે 1.9 ટ્રિલિયન યુઆન (લગભગ USD 275 બિલિયન) ફાળવવામાં આવશે.
જોકે તેમણે દાવો કર્યો હતો કે ચીનનો સંરક્ષણ ખર્ચ મુખ્ય સંબંધિત સૂચકાંકોની તુલનાત્મક સાધારણ છે. આ સૂચકાંકોમાં જીડીપીમાં તેનો હિસ્સો, માથાદીઠ સંરક્ષણ ખર્ચ અને લશ્કરી કર્મચારીઓ દીઠ સંરક્ષણ ખર્ચનો સમાવેશ થાય છે.
ગયા વર્ષે ચીને 2025 માટે તેના રાષ્ટ્રીય સંરક્ષણ બજેટમાં 7.2 ટકાનો વધારો કરીને 249 અબજ ડોલર કરવાની જાહેરાત કરી હતી, જે 2024 ની સરખામણીમાં 17 અબજ ડોલરનો વધારો છે.
દરમિયાન, ટ્રમ્પના ટેરિફ યુદ્ધ, યુએસ-ઈરાન યુદ્ધ પછી વણસી રહેલા વૈશ્વિક સંકટ અને પ્રોપર્ટી બજારમાં મંદી અને બેરોજગારી સંકટને કારણે સ્થાનિક અર્થતંત્રમાં અવરોધો વચ્ચે ચીને ગુરુવારે આ વર્ષ માટે તેના GDP લક્ષ્યને ઘટાડીને 4.5 થી 5 ટકા કર્યો હતો.
