અમેરિકાના પ્રમુખ ડોનાલ્ડ ટ્રમ્પે સોમવારે જણાવ્યું હતું કે ઓસ્ટ્રેલિયા ઈરાનની રાષ્ટ્રીય મહિલા ફૂટબોલ ટીમને સ્વદેશ પરત મોકલીને ભયાનક માનવતાવાદી ભૂલ કરી રહ્યું છે. ઇરાનમાં તેમને મોટા ભાગે મારી નાખવામાં આવશે. ટ્રમ્પે ઓસ્ટ્રેલિયાના વડાપ્રધાનને ટીમના સભ્યોને આશ્રય આપવાનો પણ અનુરોધ કર્યો હતો.
ઇરાન પર અમેરિકા અને ઇઝરાયેલના હુમલા પહેલા એશિયન કપ ટુર્નામેન્ટમાં ભાગ લેવા માટે આ ટીમ ઓસ્ટ્રેલિયા આવી હતી. રવિવારે ફિલિપાઇન્સ સામે 2-0થી હાર બાદ ટીમ આ ટુર્નામેન્ટમાંથી બહાર થઈ ગઈ છે.
ટ્રમ્પે ટ્રુથ સોશિયલ પર પોસ્ટ કર્યું હતું કે ઈરાન રાષ્ટ્રીય મહિલા ફૂટબોલ ટીમને બળજબરીથી ઈરાન પાછા મોકલીને ઓસ્ટ્રેલિયા એક ભયંકર માનવતાવાદી ભૂલ કરી રહ્યું છે, જ્યાં તેમની હત્યા થવાની સંભાવના છે. જો તમે આશ્રય નહીં આપો તો અમેરિકા તેમને લઈ જશે.
ઓસ્ટ્રેલિયાના SBS ન્યૂઝે જણાવ્યું હતું કે ઈરાની મહિલા ફૂટબોલ ટીમની પાંચ ખેલાડીઓ “અલગ” થઈ ગઈ છે અને હવે તેઓ ઓસ્ટ્રેલિયન ફેડરલ પોલીસના રક્ષણ હેઠળ છે અને સરકાર પાસેથી મદદ માંગી રહી છે. ઓસ્ટ્રેલિયાના ગૃહમંત્રી ટોની બર્ક મહિલાઓને મળવા માટે બ્રિસ્બેન ગયા હતાં. દક્ષિણ કોરિયા સામેની તેમની પહેલી મેચ પહેલા ઈરાનના રાષ્ટ્રગીત દરમિયાન આ ખેલાડીઓ મૌન રહી હતી. તેનાથી ઇરાને યુદ્ધ સમયના દેશદ્રોહીનું લેબલ માર્યું છે.
