લેસ્ટરશાયર ફાયર એન્ડ રેસ્ક્યુ સર્વિસ (LFRS) ની અચાનક ગેરહાજરીથી આ વર્ષે હોળીની ઉજવણી ખોરવાઈ જતા લેસ્ટરના હિન્દુ સમુદાયમાં આક્રોશ ફેલાયો હતો. તેને સ્થાનિક નેતાઓ દ્વારા “નોંધપાત્ર નિષ્ફળતા” તરીકે ઓળખવામાં આવી છે. 40 વર્ષ કરતા વધુ સમયથી હોલીકા દહન દરમિયાન અકસ્માત ન થાય તે માટે ફાયર બ્રિગેડ પર આધાર રાખવામાં આવે છે.
નોર્થ એવિંગ્ટનનું પ્રતિનિધિત્વ કરતા કોન્ઝર્વેટીવ રૂઢિચુસ્ત કાઉન્સિલરો સંજય મોઢવાડિયા અને દિલીપ જોશીએ સોમવાર, 2 માર્ચના રોજ વિક્ષેપ અંગે “ગંભીર ચિંતાઓ” વ્યક્ત કરી જણાવ્યું હતું કે “છેલ્લી ઘડીએ, અકસ્માત થાય તો આગ ઠાકી શકાય તે માટે પાણીના ટેન્કર આપવાનો ઇનકાર કરવામાં આવ્યો હતો. આ અચાનક નિર્ણયથી હજારો ઉપસ્થિતોને મૂંઝવણ, તકલીફ અને નોંધપાત્ર અસુવિધા થઈ હતી અને હોલિકા દહન યોગ્ય સમયે પૂર્ણ થઈ શક્યું ન હતું.”
LFRS ચીફ ફાયર ઓફિસર કેલમ ફેઇન્ટે ખુલાસો કર્યો હતો કે જાન્યુઆરીમાં કાર્યક્રમની ચર્ચા કરવા માટે સમુદાયના નેતાઓ સાથે યોજાયેલ બેઠકમાં નેતાઓ હાજર રહ્યા ન હતા. ત્યારબાદ સંવાદને આગળ વધારવાના પ્રયાસોને આયોજકો દ્વારા અવગણવામાં આવ્યા હતા.
