આ અઠવાડિયે પ્રકાશિત થયેલા પાર્કર રિવ્યુના તારણો અનુસાર, બ્રિટનની સૌથી મોટી કંપનીઓના બોર્ડમાં વંશીય વિવિધતા રેકોર્ડરૂપ ઉચ્ચતમ સ્તરે પહોંચી ગઈ છે. અભ્યાસમાં FTSE 100 અને FTSE 250 પર નોંધાયેલી કંપનીઓ તેમજ યુકેના 50 સૌથી મોટા ખાનગી બિઝનેસીસમાં બોર્ડ પ્રતિનિધિત્વની તપાસ કરી બોર્ડરૂમની વિવિધતામાં સતત પ્રગતિ પર પ્રકાશ પાડવામાં આવ્યો હતો. જો કે ચેતવણી આપવામાં આવી હતી કે વરિષ્ઠ મેનેજમેન્ટ ભૂમિકાઓમાં હજુ પણ પડકારો છે.
સમીક્ષામાં જાણવા મળ્યું છે કે હવે FTSE 100 કંપનીઓમાં તમામ બોર્ડ હોદ્દાઓમાંથી વંશીય લઘુમતીઓનું પ્રતિનિધિત્વ 20 ટકા છે, જે 1,063 ડિરેક્ટરશીપમાંથી 208 છે. આ પ્રમાણ 2024માં નોંધાયેલા 19 ટકાથી સાધારણ વધારો દર્શાવે છે.
2015માં પાર્કર રિવ્યુએ બોર્ડરૂમમાં વંશીય વિવિધતાને ટ્રેક કરવાનું શરૂ કર્યું ત્યારે FTSE 100 કંપનીઓમાં ફક્ત 47 વંશીય લઘુમતી ડિરેક્ટર હતા. પણ હવે કુલ 98 કંપનીઓમાં ઓછામાં ઓછા એક વંશીય લઘુમતી ડિરેક્ટર છે. તારણો સૂચવે છે કે મોટાભાગની મોટી લિસ્ટેડ કંપનીઓએ પહેલ દ્વારા નિર્ધારિત સ્વૈચ્છિક લક્ષ્યોને સ્વીકાર્યા છે. 14 FTSE 100 કંપનીઓ હાલમાં વંશીય લઘુમતી ચીફ એક્ઝિક્યુટિવ્સ દ્વારા સંચાલિત છે – જે અત્યાર સુધીની સૌથી વધુ સંખ્યા છે. જ્યારે આઠ બોર્ડ ચેર અને નવ ચિફ ફાઇનાન્સીયલ ઓફિસર્સ પણ લઘુમતી પૃષ્ઠભૂમિમાંથી આવે છે. વધુમાં, તેમના બોર્ડમાં એક કરતાં વધુ વંશીય લઘુમતી ડિરેક્ટર ધરાવતી કંપનીઓની સંખ્યામાં પણ વધારો થયો છે અને હવે 56 FTSE 100 કંપનીઓ તે માપદંડને પૂર્ણ કરે છે.
પાર્કર રિવ્યુ કમિટીના અધ્યક્ષ ડેવિડ ટાયલરે જણાવ્યું હતું કે ‘’વિવિધતા પહેલની આસપાસ રાજકીય અને કોર્પોરેટ ચર્ચાઓ વધી રહી હોવા છતાં પ્રગતિ બિઝનેસ સમુદાય તરફથી વધતી જતી સંલગ્નતાને પ્રતિબિંબિત કરે છે. યુકેના વર્કફોર્સની વંશીય રચના છેલ્લા 25 વર્ષોમાં નોંધપાત્ર રીતે વધુ વૈવિધ્યસભર બની છે અને તે વિકસિત થતી રહેશે. કંપનીઓ સમજે છે કે સ્પર્ધાત્મક રહેવા માટે લઘુમતી વંશીય સમુદાયોમાં પ્રતિભાશાળી લોકોની ભરતી અને જાળવણી કરીને તેમને આનો જવાબ આપવાની જરૂર છે.”
આ અહેવાલમાં FTSE 250 કંપનીઓમાં પ્રગતિ પર પણ પ્રકાશ પાડવામાં આવ્યો છે. લગભગ 205 કંપનીઓ – જે સૂચકાંકના 82 ટકાનું પ્રતિનિધિત્વ કરે છે – હવે તેમના બોર્ડમાં ઓછામાં ઓછા એક વંશીય લઘુમતી ડિરેક્ટર છે. સમીક્ષામાં ડેટા સબમિટ કરનારી કંપનીઓમાં, આ આંકડો વધીને 89 ટકા થયો છે. FTSE 250 કંપનીઓમાં વંશીય લઘુમતી હવે બોર્ડ બેઠકોના લગભગ 16 ટકા પર કબજો કર્યો છે, જે 2024માં 15 ટકાથી વધુ છે.
જોકે, સમીક્ષામાં જાણવા મળ્યું છે કે મોટી ખાનગી કંપનીઓએ ધીમી પ્રગતિ કરી છે. ભાગ લેવા માટે આમંત્રિત 50 મોટી ખાનગી કંપનીઓમાંથી, ફક્ત 36 એ ડેટા સબમિટ કર્યો હતો. તેમાંથી, ફક્ત 21 કંપનીઓ એટલે કે લગભગ 42 ટકા – હાલમાં ઓછામાં ઓછા એક વંશીય લઘુમતી ડિરેક્ટર રાખવાના લક્ષ્યને પૂર્ણ કરે છે, જે પાછલા વર્ષના 48 ટકાથી ઘટાડો દર્શાવે છે. આ બિઝનેસીસને વિવિધતાના લક્ષ્યને પૂર્ણ કરવા માટે ડિસેમ્બર 2027 સુધીનો સમય આપવામાં આવ્યો છે.
બોર્ડ સ્તરે સુધારો થોય હોવા છતાં, આ અહેવાલ ચેતવણી આપે છે કે વરિષ્ઠ મેનેજમેન્ટમાં પ્રતિનિધિત્વ નોંધપાત્ર રીતે ઓછું રહે છે. FTSE 100 કંપનીઓમાં યુકે સ્થિત વરિષ્ઠ મેનેજમેન્ટ ભૂમિકાઓમાં વંશીય લઘુમતીઓનો હિસ્સો સરેરાશ 11 ટકા છે અને FTSE 250 કંપનીઓ અને મોટી ખાનગી કંપનીઓ બંનેમાં લગભગ 10 ટકા છે.
કંપનીઓએ 2027 સુધીમાં આ આંકડા સુધારવા માટે સ્વૈચ્છિક લક્ષ્યો નક્કી કર્યા છે, જેમાં FTSE 100 કંપનીઓ વરિષ્ઠ મેનેજમેન્ટમાં સરેરાશ 15 ટકા વંશીય લઘુમતી પ્રતિનિધિત્વનું લક્ષ્ય રાખે છે. FTSE 250 કંપનીઓ 13 ટકાને લક્ષ્ય બનાવી રહી છે, જ્યારે મોટી ખાનગી કંપનીઓ 15 ટકાનું લક્ષ્ય રાખે છે.
રિપોર્ટના લોન્ચ ઇવેન્ટમાં બોલતા, ચેન્જ ધ રેસ રેશિયો સંસ્થાના અધ્યક્ષ સર ટ્રેવર ફિલિપ્સે પ્રગતિનું સ્વાગત કરતાં ચેતવણી આપી હતી કે ડેટામાં ગંભીર અંતર પણ બહાર આવ્યું છે. તેમણે કહ્યું હતું કે “જ્યારે સમાનતા, વિવિધતા અને સમાવેશની પહેલો વધતા દબાણનો સામનો કરી રહી છે, ત્યારે યુકેના પ્રોફેશનલ નેતાઓ મક્કમ છે કારણ કે તેઓ લેબર માર્કેટની સંપૂર્ણ શક્તિનો ઉપયોગ કરવાના વ્યાપારી ફાયદાઓને ઓળખે છે.”
યુકેના ટ્રેડ સેક્રટરી પીટર કાયલે તારણોનું સ્વાગત કરતા કહ્યું હતુ કે ‘’પ્રગતિ ચાલુ રહેવી જોઈએ. લીડરશીપ રોલ્સમાં પ્રવેશ સુધારવાથી ખાતરી થાય છે કે સૌથી પ્રતિભાશાળી વ્યક્તિઓ નવીનતા અને આર્થિક વિકાસમાં યોગદાન આપી શકે છે.’’
પાર્કર રિવ્યૂ 2015 માં યુકે બોર્ડરૂમ અને વરિષ્ઠ નેતૃત્વમાં વંશીય વિવિધતાને સુધારવા માટે ફરજિયાત ક્વોટાને બદલે સ્વૈચ્છિક પ્રતિબદ્ધતાઓ દ્વારા શરૂ કરવામાં આવ્યો હતો. 2025 નો રિપોર્ટ ડેવિડ ટાયલરના નેતૃત્વ હેઠળનો અંતિમ રિપોર્ટ છે અને તેમણે રચના થઈ ત્યારથી આ પહેલનું નેતૃત્વ કર્યું છે. તેઓ માર્ચના અંતમાં સ્ટીયરિંગ કમિટીમાંથી રાજીનામું આપશે, અને સૌમેન દાસ વચગાળાના ધોરણે કાર્યભાર સંભાળશે તેવી અપેક્ષા છે.
