બ્રિટિશ એશિયનોએ વિવિઘ રાજકીય પક્ષોને ઉદારતાથી દાન આપ્યું

• પ્રમોદ થોમસ દ્વારા

બ્રિટિશ એશિયનોએ 2025ના ઓક્ટોબરથી ડિસેમ્બર સુઘીના છેલ્લા ક્વાર્ટરમાં યુકેના વિવિઘ રાજકીય પક્ષોને ઉદારતાથી દાન આપ્યું હતું, જેમાં લેબર, કોન્ઝર્વેટીવ્સ, લિબરલ ડેમોક્રેટ્સ અને નવી રચાયેલી યોર પાર્ટીને રોકડનો પ્રવાહ મળ્યો હતો, એમ ચૂંટણી પંચના ડેટામાં તા. 5ને ગુરુવારે જાહેર કરવામાં આવ્યું હતું.

એશિયન દાતાઓ તરફથી સૌથી વધુ યોગદાન જેરેમી કોર્બિન અને ભૂતપૂર્વ લેબર સાંસદ ઝારાહ સુલ્તાના દ્વારા સહ-સ્થાપિત ડાબેરી મુવમેન્ટ ‘યોર પાર્ટી’ને મળ્યું હતું.

ઝારા સુલ્તાનાના MOU ઓપરેશન્સ લિમિટેડે ઓક્ટોબર અને નવેમ્બર 2025ની વચ્ચે પાર્ટીને £100,000 લેખે ચાર અલગ દાન દ્વારા કુલ £400,000 આપ્યા હતા. તો ઝારાહ સુલ્તાના કેમ્પેઇન્સ લિમિટેડ દ્વારા વધુ £70,067નું દાન અપાયું હતું.

સ્કોટલેન્ડ સ્થિત ગ્લોબલ પેપર ટ્રેડિંગ ફર્મ પીજી પેપર કંપની લિમિટેડ દ્વારા ડિસેમ્બર 2025માં સ્કોટિશ લેબરને £200,000 અને તે જ મહિનામાં બીજા £33,950 મળી કુલ £233,950 દાન આપ્યું હતું. તેની સ્થાપના એશિયન ઉદ્યોગસાહસિકો ડૉ. પૂનમ ગુપ્તા ઓબીઇ અને પુનીત ગુપ્તા ઓબીઇ દ્વારા કરવામાં આવી હતી. 2003માં પૂનમ દ્વારા ઇન્વરક્લાઇડમાં આવેલા ઘરના રસોડામાં સ્થાપવામાં આવેલી પીજી પેપર સ્કોટલેન્ડની સૌથી મોટી ટ્રેડિંગ કંપની છે, જે 60 થી વધુ દેશોમાં કાર્યરત છે.

વ્યક્તિગત દાતા હરીશ સોઢાએ ઓક્ટોબરમાં £100,000 અને સપ્ટેમ્બરમાં £50,000નું ઉદાર દાન આપ્યું છે. યુગાન્ડાથી ભાગી આવેલા સોઢાએ ડાયવર્સિટી ટ્રાવેલની સ્થાપના કરતા પહેલા કી ટ્રાવેલની સહ-સ્થાપના કરી હતી.

લેબરને કરીમ પોલ નાખલા અને સુસાન એલિઝાબેથ નાખલાની રોકટેલ સર્વિસીસ લિમિટેડ તરફથી £54,000, ડિસેમ્બરમાં £34,000 અને ઓક્ટોબર અને નવેમ્બરમાં £20,000 મળ્યા હતા. તો કુલવિંદર સિંહ, મલકીત સિંહ અને સતનામ સિંહની મિસ્ટર સિંઘ્સ યુકે લિમિટેડે સ્કોટિશ લેબરને સંયુક્ત £5,950 આપ્યા હતા.

કન્ઝર્વેટિવ્સને કમલ, સુનિલ અને તેમના પિતા વ્રજ પાનખાણીયા દ્વારા સંચાલિત વેસ્ટકોમ્બ ડેવલપમેન્ટ્સ લિમિટેડે ઓક્ટોબરમાં £100,000 અને નવેમ્બરમાં £50,000નું દાન આપ્યું હતું. કમલે £2,400નું વ્યક્તિગત દાન પણ આપ્યું હતું.

ટોરીઝને હુસ્નેલ સિંહ, જય સિંહ, પ્રિતપાલ સિંહ અને સુખપાલ સિંહ આહલુવાલિયાના ડોમિનસ યુકે હોલ્ડિંગ્સ લિમિટેડ તરફથી £14,999 મળ્યા છે. અન્ય દાતાઓમાં, મનદીપ સિંહે વ્યક્તિગત રીતે £25,000 આપ્યા હતા. જ્યારે મલિક કરીમે £5,000 નું યોગદાન આપ્યું હતું. બલરાજ અને સુનીલ ટંડન સાથે સંકળાયેલી ક્રોયડન સ્થિત કંપની પાર્ક ગેરેજ ગ્રુપ પીએલસીએ ટોરીઝને £10,000નું દાન આપ્યું હતું.

લિબરલ ડેમોક્રેટ્સે વ્યક્તિગત એશિયન દાતાઓને આકર્ષ્યા હતા. હેલ્થ કેર અને પ્રોપર્ટીમાં રસ ધરાવતા અનુભવી બિઝનેસમેન સુધીર ચૌધરીએ ઓક્ટોબર અને ડિસેમ્બર વચ્ચે કુલ £21,466 આપ્યા હતા. તુષાર એસ પ્રભુએ બે હપ્તામાં £17,500નું; રમેશ દિવાને £8,500 અને અહેમદ એએ હિંદાવીએ £15,000 તથા એજાઝ અહેમદ અને અફશાન અહેમદ દ્વારા સંચાલિત રેઈનબો ફોસ્ટરિંગ સર્વિસીસ લિમિટેડે લિબરલ ડેમ્સને £5,000નું દાન આપ્યું હતું.

બધા પક્ષો દ્વારા, 2025ના ચોથા ક્વાર્ટરમાં £15.45 મિલિયન સ્વીકારવામાં આવ્યું હતું, જે 2024માં સમાન સમયગાળામાં નોંધાયેલા £7,462,837ના દાન કરતા બમણાથી વધુ છે.

રિફોર્મે સમગ્ર 2025 દરમિયાન £18 મિલિયનથી વધુ એકત્ર કર્યા

આ આંકડાઓમાં નાઇજેલ ફરાજની રિફોર્મ યુકેનું પ્રભુત્વ હતું, જેણે ફક્ત ક્વાર્ટરમાં £5.5 મિલિયન એકત્ર કર્યા હતા, જેમાં ક્રિપ્ટો રોકાણકાર ક્રિસ્ટોફર હાર્બર્નના £3 મિલિયન ટોચ પર હતા. રિફોર્મે સમગ્ર 2025 દરમિયાન £18 મિલિયનથી વધુ એકત્ર કર્યા હતા, જે લેબરના £8.1 મિલિયનથી વધુ અને કન્ઝર્વેટિવ્સના £13.4 મિલિયનથી વધુ હતા.

ઇલોકેટોરલ એડમિનિસ્ટ્રેશન એન્ડ રેગ્યુલેશનના ડિરેક્ટર જેકી કિલીને જણાવ્યું હતું કે “2025 દરમિયાન રાજકીય પક્ષો દ્વારા લગભગ £65 મિલિયનનું દાન સ્વીકારવામાં આવ્યું હતું. યુકેની રાજકીય નાણાકીય વ્યવસ્થામાં પારદર્શિતાનું ઉચ્ચ સ્તર છે, અને અમે જાણીએ છીએ કે મતદારોને રસ છે કે પક્ષો તેમના નાણાં ક્યાંથી મેળવે છે. આ પ્રકાશન મતદારો સુધી આ માહિતી પહોંચાડવાનો એક મહત્વપૂર્ણ ભાગ છે. જોકે, અમે જાણીએ છીએ કે સિસ્ટમના કેટલાક ભાગોને મજબૂત બનાવવાની જરૂર છે, અને અમે કેટલાક સમયથી કાયદામાં ફેરફારોની માંગ કરી રહ્યા છીએ. યુકે સરકાર દ્વારા લોકોના પ્રતિનિધિત્વ બિલમાં રાજકીય નાણાકીય વ્યવસ્થામાં પ્રસ્તાવિત સુધારા દાન નિયંત્રણોને મજબૂત બનાવી શકે છે અને મતદારોને રાજકીય નાણાકીય વ્યવસ્થામાં વિશ્વાસ રાખવા મદદ કરી શકે છે. અમે સરકાર સાથે કામ કરવાનું ચાલુ રાખીશું જેથી કોઈપણ ફેરફારો પુરાવા આધારિત અને વ્યવહારમાં કાર્યક્ષમ હોય.”