પ્રિન્સેસ ઓફ વેલ્સ કેટે લેસ્ટરનો ભારતીય અને હિન્દુ સમુદાય હોળીના તહેવારની ઉજવણી કરતો હતો ત્યારે લેસ્ટરની મુલાકાત લઇ શહેરમાં બ્રિટિશ ભારતીય સમુદાયની સંસ્કૃતિ, સમુદાય અને વારસાની ઉજવણી કરી હતી. આકર્ષક ઓલ-ક્રીમ પોશાક પહેરી આવેલા રાજકુમારી કેટની એક ઝલક જોવા માટે દુકાનદારો, તેમના ગ્રાહકો અને રાહદારીઓની ભીડ ઉમટી પડી હતી.
44 વર્ષીય કેટે કેટે સૌ પ્રથમ બેલગ્રેવ નેબરહુડ સેન્ટર ખાતે 2011માં લેસ્ટરમાં સ્થપાયેલ ડાન્સ ગૃપ ‘આકાશ ઓડેદરા કંપની’ની મુલાકાત લીધી હતી. બર્મિંગહામમાં જન્મેલા ઓડેદરા અને તેમના ગૃપે રાજકુમારી સમક્ષ 16 સંગીતકારો સાથેના નવીનતમ નૃત્ય પરફોર્મન્સ ‘સોંગ્સ ઓફ ધ બુલબુલ’ રજૂ કર્યું હતું. જે એક પ્રાચીન સૂફી વાર્તાનું અર્થઘટન હતું. કેટને તાજા લાલ ગુલાબ અને મોતીનો હાથથી બનાવેલો હાર પહેરાવવામાં આવ્યો હતો જે તેણીએ આખો દિવસ પહેરી રાખ્યો હતો.
ત્યાંથી, કેટ બેલગ્રેવ રોડ પર પરિવાર દ્વારા સંચાલિત સાડીની દુકાન ‘લાડલી’ની મુલાકાતે ગયા હતા. તેના 31 વર્ષીય માલિક નીલ ઠકરારે જણાવ્યું હતું કે ‘’રાજકુમારીએ કાપડ અને બિઝનેસના ઇતિહાસમાં ખૂબ રસ લીધો હતો અને ‘આ કેવા પ્રકારનું રેશમ છે, આ કેવી રીતે બને છે?’ તથા કૌટુંબિક બિઝનેસ કેટલી પેઢીઓથી ચાલી રહ્યો છે? વગેરે માહિતી મેળવી હતી. રાજકુમારી લાડલીમાં પ્રવેશ કરતા હતા ત્યારે તેમને જોઇને રોમાંચિત ડ્રાઇવરોએ ઉત્સાહમાં તેમના વાહનોના હોર્ન વગાડ્યા હતા.
ત્યારબાદ કેટ રસ્તો ઓળંગીને પરિવાર દ્વારા સંચાલિત ‘બોબીઝ રેસ્ટોરન્ટ’માં ગયા હતા અને પારંપરિક ભારતીય ચા અને પકોડાનો સ્વાદ માણ્યો હતો. તેમણે યજમાનો, ધર્મેશ અને એન્ના લાખાણીને ખાતરી આપી હતી કે તેના માટે “મસાલા ઠીક (માફકસર) છે.”
કેટે સોથી છેલ્લે સ્થાનિક વૈષ્ણવ સમુદાયના હિન્દુ મંદિર શ્રીજી ધામ હવેલીની મુલાકાત લીધી હતી અને શાહી શિષ્ટાચારને ત્યજીને મહિલાઓના જૂથ રંપરાગત ગરબા નૃત્યમાં જોડાવા પોતાની હાઇ હીલ (ચપ્પલ) ઉતાર્યા હતા. લયબદ્ધ વર્તુળમાં ખુલ્લા પગે ફરતી વખતે તેમને હસતા જોઇ સૌ આનંદિત થઇ ગયા હતા. જેના ફૂટેજ ભારત અને અમેરિકા સહિત વિશ્વના ઘણા દેશોમાં બતાવવામાં આવ્યા હતા.
કાસલ ડોનિંગ્ટન પોસ્ટમાસ્ટર દંપતી પોસ્ટમાસ્ટર ચાન બજારિયા મંદિરના ટ્રસ્ટી છે અને તેમના પત્ની પોસ્ટમિસ્ટ્રેસ મીના બજારિયાએ ભાવિ રાણીને હોળીના તહેવાર, ભારતીય નૃત્ય અને વારસા વિશે માહિતી આપી હતી. ત્યારબાદ રાજકુમારીએ મંદિરમાં વોલંટીયર્સ અને દર્શનાર્થીઓ સાથે ભારતીય ભોજનનો આનંદ માણ્યો હતો.
