હેલેના, મોન્ટાના માટે એક સીમાચિહ્નરૂપ કાર્યક્રમમાં, ગવર્નર ગ્રેગ જિયાનફોર્ટે અને કોન્સ્યુલ જનરલ પ્રકાશ ગુપ્તાએ સંયુક્ત રીતે મોન્ટાના યુનિવર્સિટીના માઇક મેન્સફિલ્ડ સેન્ટર ખાતે મહાત્મા ગાંધીની પ્રથમ પ્રતિમાનું અનાવરણ કર્યું હતું. ભારત સરકાર તરફથી ભેટ તરીકે આપવામાં આવેલી આ નવિન કાંસ્ય પ્રતિમા યુ.એસ. પેસિફિક નોર્થવેસ્ટમાં આવેલા સિએટલ, બેલેવ્યુ અને લિંકન પછીની ચોથી પ્રતિમા છે.
આ પ્રતિમા ગાંધીજીના શાંતિ અને અહિંસાના કાલાતીત આદર્શોને શ્રદ્ધાંજલિ અર્પે છે અને ભારત અને મોન્ટાના સ્ટેટ વચ્ચે વધતી જતી ભાગીદારીને પ્રતિબિંબિત કરે છે.
ગવર્નર જિયાનફોર્ટે આધુનિક વિશ્વ માટે ગાંધીજીના અહિંસાના દર્શનની પ્રશંસા કરી જણાવ્યું હતુ કે “ગાંધીજીનું જીવન આપણને યાદ અપાવે છે કે નેતૃત્વ ચારિત્ર્યથી શરૂ થાય છે.”
1983માં કોંગ્રેસ દ્વારા સ્થાપિત મેન્સફિલ્ડ સેન્ટરની પસંદગી એટલા માટે મહત્વપૂર્ણ છે કેમ કે આ કેન્દ્ર અખંડિતતા અને નાગરિક જવાબદારીને પ્રોત્સાહન આપવા પર ધ્યાન કેન્દ્રિત કરે છે.
આ સમારોહમાં મોન્ટાનાના પ્રથમ મહિલા સુસાન ગિયાનફોર્ટે, મોન્ટાના સ્ટેટના અગ્રણી અધિકારીઓ, મોન્ટાના યુનિવર્સિટીના ફેકલ્ટી અને વિદ્યાર્થીઓ અને મોન્ટાના વર્લ્ડ અફેર્સ કાઉન્સિલના સભ્યો પણ હાજર રહ્યા હતા.
યુનિવર્સિટીએ હોળીની ઉજવણીનું પણ આયોજન કર્યું હતું અને રાજદ્વારી સમારોહ એક જીવંત સાંસ્કૃતિક ઉત્સવમાં પરિવર્તિત થયો હતો. વિદ્યાર્થીઓએ કાર્બનિક રંગો અને પરંપરાગત ગુજિયા મીઠાઈઓ સાથે વસંતના આગમનને સ્વીકાર્યું હતું અને આ ઉત્સવનું સમાપન બોલીવુડની હિટ ફિલ્મ ઝિંદગી ના મિલેગી દોબારાના સ્ક્રીનિંગ સાથે થયું હતું.
દિવસની શરૂઆતમાં, 400 વિદ્યાર્થીઓએ “બ્રાન્ડ ઇન્ડિયા” બ્રીફિંગમાં હાજરી આપી હતી અને ભારતની વન ડિસ્ટ્રિક્ટ વન પ્રોડક્ટ (ODOP) પહેલની શોધ કરી હતી. તો પ્રીમિયમ ARAKU કોફીનો ટેસ્ટ કર્યો હતો.
