વડાપ્રધાન નરેન્દ્ર મોદીએ દેશમાં સૌથી લાંબા સમય સુધી ચૂંટાયેલી સરકારના વડા તરીકે સેવા આપીને ભારતીય રાજકારણમાં વધુ એક ઐતિહાસિક સિદ્ધિ હાંસલ કરી હતી. વડાપ્રધાન મોદીએ રવિવાર, 22 માર્ચ 2026ના રોજ સિક્કિમના મુખ્યપ્રધાન તરીકે ૮,૯૩૦ દિવસ સુધી કાર્યભાર સંભાળનારા પવન કુમાર ચામલિંગને પાછળ છોડી દીધા હતાં. મોદીએ ગુજરાતના મુખ્યપ્રધાન અને દેશના વડા પ્રધાન તરીકેના તેમના કાર્યકાળને જોડીને સરકારના વડા તરીકે ૮,૯૩૧ દિવસ પૂર્ણ કર્યા છે. આની સાથે તેમણે સરકારના વડા તરીકેની ભૂમિકામાં ૨૫મા વર્ષમાં પ્રવેશ કર્યો છે.
વડાપ્રધાન મોદીએ અનેક નોંધપાત્ર રેકોર્ડ બનાવ્યા છે, જેમાં ગુજરાતના સૌથી લાંબા સમય સુધી મુખ્યપ્રધાન અને સૌથી લાંબા સમય સુધી મુખ્યપ્રધાન તરીકેનો અનુભવ ધરાવતા વડાપ્રધાન હોવાનો સમાવેશ થાય છે. તેઓ સ્વતંત્રતા પછી જન્મેલા ભારતના પહેલા વડા પ્રધાન પણ છે અને 2014, 2019 અને 2024માં સતત ત્રણ લોકસભા ચૂંટણીમાં વિજય મેળવ્યો છે, જે એક સિદ્ધિ છે.
નરેન્દ્ર મોદીએ પહેલી વાર 7 ઓક્ટોબર, 2001ના રોજ ગુજરાતના મુખ્યપ્રધાન તરીકે કાર્યભાર સંભાળ્યો હતાો અને 21 મે, 2014 સુધી આ ભૂમિકામાં રહ્યાં હતાં. રાષ્ટ્રીય રાજકારણમાં પ્રવેશતા પહેલા 13 વર્ષથી વધુ સમય સુધી રાજ્યનું નેતૃત્વ કર્યું હતું.
તેમણે ૨૬ મે, ૨૦૧૪ના રોજ ભારતના ૧૪મા વડા પ્રધાન તરીકે શપથ લીધા હતાં અને લોકસભામાં પૂર્ણ બહુમતી મેળવનારા પ્રથમ બિન-કોંગ્રેસી નેતા બન્યા હતા. બાદમાં તેઓ બે પૂર્ણ કાર્યકાળ પૂર્ણ કરનારા અને સતત ત્રીજા કાર્યકાળ માટે પાછા ફરનારા પ્રથમ બિન-કોંગ્રેસી વડા પ્રધાન બન્યા હતા.
ટોચના કેન્દ્રીય પ્રધાનોએ નરેન્દ્ર મોદીને 8,931 દિવસની જાહેર સેવા પૂર્ણ કરવાની ઐતિહાસિક સિદ્ધિ બદલ અભિનંદન આપ્યાં હતાં. તેમણે જણાવ્યું કે ગુજરાતના મુખ્યપરધાન તરીકે શરૂ થયેલી અને હવે પ્રધાનમંત્રી તરીકે ચાલુ રહેલી તેમની સફર દેશ પ્રત્યેની તેમની ઊંડી પ્રતિબદ્ધતા દર્શાવે છે. અમિત શાહ, જે પી નડ્ડા, પીયૂષ ગોયલ અને અશ્વિની વૈષ્ણવ જેવા કેન્દ્રીય પ્રધાનોએ જણાવ્યું હતું કે “મોદી યુગ”એ વિકાસના નવા માપદંડો ઉભા કરી ભારતને વૈશ્વિક પ્રતિષ્ઠામાં વધારો કર્યો છે. ગૃહપ્રધાન અમિત શાહે કહ્યું હતું કે મોદીના દાયકાઓના “સેવા”એ એક નવો યુગ સર્જ્યો છે.
