મધ્યપૂર્વમાં ચોથા સપ્તાહમાં પ્રવેશેલું યુદ્ધ વધુ ઉગ્ર બન્યું હતું. ઇઝરાયેલે ઇરાનના નતાન્ઝ પરમાણુ સંવર્ધન પ્લાન્ટ પર હવાઈ હુમલા કર્યો હોવાનો ઇરાને દાવો કર્યો હતો. જોકે તેનાથી કોઈ રેડિયેશન લીકેજ થયું ન હતું. બીજી તરફ ઇરાને ઇઝરાયેલના ડિમોના અરાદ શહેરો પર મિસાઇલ હુમલા કર્યા હતાં. ઇઝરાયલનું ગુપ્ત પરમાણુ રિએક્ટર ડિમોનાથી લગભગ 13 કિલોમીટર દૂર છે. આ હુમલામાં કેટલાંક બાળકો સહિત 100થી વધુ લોકો લોકો ઘાયલ થયા હતાં. ડિમોના શહેર લીટલ ઇન્ડિયા તરીકે પણ ઓળખાય છે અને ત્યા આશરે 33 લોકો ઘાયલ થયા હતાં. અહીં પરમાણુ રિએક્ટર હોવાથી ઊંચી હવાઈ સુરક્ષા પ્રણાલી છે. જોકે આ તમામ એર ડિફેન્સ સિસ્ટમને ભેદી આવેલી મિસાઇલોએ શહેરમાં ભારે વિનાશ સજ્યો હતો.
નતાંઝ ખાતેનો આ અણુ પ્લાન્ટ તહેરાનથી આશરે 220 કિમી દૂર છે. ઇઝરાયલે આવા કોઇ હુમલાથી અજાણ હોવાનું કહ્યું હતું, જ્યારે આંતરરાષ્ટ્રીય પરમાણુ ઊર્જા એજન્સી (IAEA)ના વડાએ કહ્યું હતું કે એજન્સી તપાસ કરી રહી છે. રશિયાએ પરમાણુ પ્લાન્ટ પરના હુમલાને નિંદા કરી તેને આંતરરાષ્ટ્રીય કાયદાનું ઉલ્લંઘન ગણાવ્યું હતું.
ઇઝરાયેલના સંરક્ષણ પ્રધાન ઇઝરાયેલ કાત્ઝે શનિવારે જણાવ્યું હતું કે આગામી અઠવાડિયામાં ઇરાન સામેના હુમલામાં મોટો વધારો થશે. અમેરિકાએ આ ક્ષેત્રમાં વધુ ત્રણ યુદ્ધ જહાજો અને 2,500 મરીન મોકલવાની જાહેરાત કરી હતી. ઇરાનને વિશ્વભરના પ્રવાસન સ્થળો પર હુમલો કરવાની ધમકી આપ્યા પછી અમેરિકાએ આ હિલચાલ કરી હતી. આ મરીન આ ક્ષેત્રમાં પહેલાથી જ હાજર 50,000થી વધુ યુએસ સૈનિકો સાથે જોડાશે.
કાત્ઝે એક વીડીયો નિવેદનમાં જણાવ્યું હતું કે આગામી સપ્તાહે ઇરાનના ધાર્મિક શાસક સામે ઇઝરાયલ અને અમેરિકાના હુમલાની તીવ્રતામાં મોટો વધારો થશે. તેલ અવીવ નજીક એક ખાલી બાલમંદિરમાં ઈરાની મિસાઈલના ટુકડા પડ્યા પછી તેમણે આ નિવેદન આપ્યું હતું. ઇઝરાયલી આર્મીના પ્રવક્તા નાદવ શોશાનીએ બાલમંદિરના બિલ્ડિંગનો X પર
એક વીડિયો પોસ્ટ કર્યો હતો. હુમલા સમયે આ બિલ્ડિંગ ખાલી હોવાથી કોઇ જાનહાનિ થઈ ન હતી.
ઈરાનની સત્તાવાર સમાચાર એજન્સી મિઝાને જણાવ્યું હતું કે તહેરરાનથી લગભગ 220 કિલોમીટર દક્ષિણપૂર્વમાં આવેલા નાતાન્ઝ પરમાણુ સુવિધા પર શનિવારે થયેલા હુમલા પછી કોઈ લીકેજ થયું નથી. ઈરાનની મુખ્ય યુરેનિયમ સંવર્ધન સાઇટને યુદ્ધના પહેલા અઠવાડિયામાં જ ટાર્ગેટ કરાઈ હતી. સેટેલાઇટ ઇમેજ અનુસાર ઘણી ઇમારતોને નુકસાન થયું હતું.
