નાસાના આર્ટેમિસ II મિશનમાં સવાર ચાર અવકાશયાત્રી ઉડાન ભર્યાના છઠ્ઠા દિવસે એટલે કે સોમવારે વહેલી સવારે ચંદ્રના ગુરુત્વાકર્ષણ પ્રભાવના ક્ષેત્રમાં પ્રવેશ કર્યો હતો. તેઓ માનવ ઇતિહાસમાં પૃથ્વીથી સૌથી દૂર જવાનો રેકોર્ડ બનાવવા માટે આગળ વધી રહ્યાં છે.
સાંજે 7:05 વાગ્યા સુધીમાં તેઓ પૃથ્વીથી મિશનનું મહત્તમ અંતર આશરે 252,757 માઇલ સુધી પહોંચી જશે, જે એપોલો 13ના અવકાશયાત્રીના 56 વર્ષ પહેલાના રેકોર્ડથી 4,102 માઇલ વધુ હશે.
પહેલી એપ્રિલે આર્ટેમિસ II મિશન હેઠળ ચાર અવકાશાત્રીઓએ ફ્લોરિડામાં નાસાના કેનેડી સ્પેસ સેન્ટરથી 322 ફૂટ (98 ફૂટ)ના મહાકાય સ્પેસ લોન્ચ સિસ્ટમ (SLS) રોકેટ મારફત ઓરિઅન ક્રૂ કેપ્સ્યુલમાં સફર ચાલુ કરી હતી. આ મિશન હેઠળ આશરે 50 વર્ષ પછી માનવીને ચંદ્રની ફરતે યાત્રા કરાવવાની નાસાની મહત્ત્વકાંક્ષી યોજના છે.
મિશનના અવકાશયાત્રીઓમાં ક્રિસ્ટીના કોચ, વિક્ટર ગ્લોવર, રીડ વાઈઝમેન અને કેનેડિયન અવકાશયાત્રી જેરેમી હેન્સનનો સમાવેશ થાય છે. આર્ટેમિસ II મિશન હેઠળ અવકાશયાત્રીઓ 10 દિવસ સુધી ચંદ્રની આસપાસની સફર કરશે અને પછી પરત આવશે. તેમની યાત્રા 252,000 માઇલ (406,000 કિમી) દૂરની હશે, જે માનવજાતની અત્યાર સુધીની સૌથી દૂરની મુસાફરી હશે. 10 દિવસના મિશન પછી આ અવકાશયાત્રીઓ 10 એપ્રિલ, 2026 સુધીમાં પરત આવે તેવી શક્યતા છે.
અગાઉ 1970માં એપોલો-13ના ચંદ્ર મિશનમાં ત્રણ અવકાશયાત્રીઓ આશરે 248,000 માઇલની સૌથી દૂર અવકાશ ઉડાન કરી હતી. એપોલો-13 મિશન ઓક્સિજન ટાંકીમાં વિસ્ફોટ પછી તકનીકી સમસ્યાઓથી ઘેરાયેલું હતું અને યોજના મુજબ ચંદ્ર પર ઉતરાણ કરી શક્યુ ન હતું.
નાસાનું પહેલું સમાનવ અવકાશયાન એપોલો -11 (20, જુલાઇ, 1969) હતું. એપોલો- 11 અવકાશયાનમાં નાસાના નીલ આર્મસ્ટ્રોંગ, બઝ એલ્ડ્રીન, માઇકલ કોલીન્સ હતાં. નીલ આર્મસ્ટ્રોંગ અને બઝ એલ્ડ્રીન ચંદ્રની ધરતી પર ઉતર્યા હતાં, જ્યારે માઇકલ કોલીન્સ ચંદ્રની ધરતીથી ઉપર ફરતાં ઓર્બિટરમાં હતાં. નીલ આર્મસ્ટ્રોંગ અને બઝ એલ્ડ્રીન તેમની સાથે ચંદ્રના ખડકો લાવ્યા હતાં, જેનું વિશ્વના ખગોળશાસ્ત્રીઓએ સંશોધન કર્યું હતું.
