ગુજરાત ગૃહ વિભાગે મહાત્મા ગાંધીના જન્મસ્થળ પોરબંદરમાં એક હોટલને સત્તાવાર રીતે દારૂનું લાઇસન્સ આપતા મોટો વિવાદ ઊભો થયો હતો. 3-સ્ટાર બિઝનેસ હોટેલ લોર્ડ્સ ઇનને વાઇન શોપ ચલાવવા માટે લાઇસન્સ મેળવ્યું છે.
ગુજરાતમાં કાયદા મુજબ દારુબંધી છે, પરંતુ ગૃહ વિભાગ ખાસ કરીને અધિકૃત પરમિટ ધારકો અને પ્રવાસીઓ માટે દારૂબંધી કાયદા હેઠળ પ્રીમિયમ હોટલો (સામાન્ય રીતે 3-સ્ટાર અને તેથી વધુ)ને દારૂના લાઇસન્સ આપી શકે છે. આવી હોટેલો માન્ય પરમિટ ધરાવતા વ્યક્તિઓને જ દારુનું વેચાણ કરી શકે છે.
જોકે સરકારની દલીલ છે કે પોરબંદર જિલ્લામાં 1,400થી વધુ પરમિટ ધારકો છે, તેથી લાઇસન્સ આપવું જરૂરી છે. સ્થાનિક કોંગ્રેસના નેતા કાંતિભાઈ બુઢેચાએ સરકારના નિર્ણયની ટીકા કરતાં જણાવ્યું હતું કે ગુજરાતમાં દારૂબંધીની વાસ્તવિકતા બધા જાણે છે. પોરબંદરમાં વાઇન શોપ ખોલવાથી એવું વાતાવરણ સર્જાય છે જે આપણી બહેનો અને દીકરીઓની સલામતી અને સુરક્ષા માટે સંભવિત જોખમ બની શકે છે. ઘણી ગાંધીવાદી લોકોએ પણ સરકારના નિર્ણયની ટીકા કરી હતી.
