વડાપ્રધાન નરેન્દ્ર મોદી અને અમેરિકાના પ્રેસિડન્ટ ડોનાલ્ડ ટ્રમ્પે મંગળવાર, 14 એપ્રિલે ફોન કોલમાં મધ્ય પૂર્વની સ્થિતિ અને દ્વિપક્ષીય સહયોગ અંગે ચર્ચાવિચારણા કરી હતી. લગભગ 40 મિનિટ ચાલેલા આ ફોન કોલ દરમિયાન બંને નેતાઓએ હોર્મુઝ સ્ટ્રેટને ખુલ્લી મૂકવા અને સુરક્ષિત રાખવાની જરૂરિયાત પર પણ ભાર મૂક્યો હતો. ઇરાન અને અમેરિકા વચ્ચે યુદ્ધવિરામ પછી બંને નેતાઓ વચ્ચે પ્રથમ વખત ફોન પર વાતચીત થઈ હતી.
ફોન કોલ પછી પીએમ મોદીએ એક ઓનલાઈન પોસ્ટમાં જણાવ્યું હતું કે ભારત અને અમેરિકા તમામ ક્ષેત્રોમાં તેમની વ્યૂહાત્મક ભાગીદારીને મજબૂત બનાવવા માટે પ્રતિબદ્ધ છે. મારા મિત્ર પ્રેસિડન્ટ ડોનાલ્ડ ટ્રમ્પનો ફોન આવ્યો. અમે વિવિધ ક્ષેત્રોમાં અમારા દ્વિપક્ષીય સહયોગમાં પ્રાપ્ત થયેલી નોંધપાત્ર પ્રગતિની સમીક્ષા કરી હતી. અમે તમામ ક્ષેત્રોમાં અમારી વ્યાપક વૈશ્વિક વ્યૂહાત્મક ભાગીદારીને વધુ મજબૂત બનાવવા માટે પ્રતિબદ્ધ છીએ. અમે પશ્ચિમ એશિયાની પરિસ્થિતિ પર પણ ચર્ચા કરી હતી અને હોર્મુઝ સ્ટ્રેટને ખુલ્લું અને સુરક્ષિત રાખવાના મહત્વ પર ભાર મૂક્યો હતો.
આ ફોનકોલ પછી ભારતમાં અમેરિકાના રાજદૂત સર્જિયો ગોરે કહ્યું હતું કે થોડીવાર પહેલા જ બંને નેતાઓ ફોન પર વાતચીત કરી હતી. પ્રેસિડન્ટ ટ્રમ્પે મધ્ય પૂર્વની સ્થિતિ અંગે અપડેટ આપ્યું હતું. ફોન પર વાત કરતા પીએમ મોદીએ ટ્રમ્પને કહ્યું હતું કે ભારતના લોકો તમને પ્રેમ કરે છે.બંને નેતાઓએ છેલ્લે 24 માર્ચે વાતચીત કરી હતી.
