વડાપ્રધાન નરેન્દ્ર મોદી અને અમેરિકાના પ્રેસિડન્ટ ડોનાલ્ડ ટ્રમ્પ વચ્ચે મંગળવારે ફોન પર વાતચીત પછી ભારત ખાતેના અમેરિકાના રાજદૂત સર્જિયો ગોરે જણાવ્યું હતું કે વડાપ્રધાન નરેન્દ્ર મોદીએ મંગળવારે પ્રેસિડન્ટ ડોનાલ્ડ ટ્રમ્પ સાથે દ્વિપક્ષીય સહયોગ પર ચર્ચાવિચારણા કરી હતી, જેમાં અનેક મોટા સોદાઓનો સમાવેશ થાય છે. આગામી થોડા દિવસો અને અઠવાડિયામાં ભારત અને અમેરિકા વચ્ચે ઊર્જા સહિત કેટલાક મોટા સોદા થવાની અપેક્ષા છે. જોકે તેમણે ભારત અને અમેરિકા વચ્ચે કયા મોટા સોદા થશે તે અંગે ફોડ પાડ્યો ન હતો.
ગોરના જણાવ્યા અનુસાર તેમની 40 મિનિટની ફોન વાતચીત દરમિયાન પશ્ચિમ એશિયામાં હોર્મુઝ સ્ટ્રેટના નાકાબંધીનો મુદ્દો પણ ચર્ચામાં આવ્યો હતો.
તાજેતરમાં ગોરે વોશિંગ્ટનની મુલાકાત લીધી હતી તથા પ્રેસિડન્ટ ડોનાલ્ડ ટ્રમ્પ તથા વેપાર પ્રધાન, નાણાપ્રધાન, સંરક્ષણ પ્રધાન સહિતના અમેરિકાના ટોચના નેતાઓને મળ્યાં હતાં.
મધ્યપૂર્વમાં યુદ્ધમાં ભારત શાંતિ પ્રક્રિયામાં ભૂમિકા ભજવી શકે કે નહીં તેવા સવાલના જવાબમાં તેમણે જણાવ્યું હતું કે અમેરિકા ભારતની ભૂમિકાનું સ્વાગત કરે છે. ભારત માટે તે એક પ્રશ્ન હશે… મને લાગે છે કે શાંતિ પ્રક્રિયામાં સમગ્ર વિશ્વની ભૂમિકા હોઈ શકે છે અને તેમાં ભારતનો પણ સમાવેશ થાય છે.
