અમેરિકાના પ્રેસિડન્ટ ડોનાલ્ડ ટ્રમ્પના ભાષણને સંપાદિત (તોડીમરોડીને રજૂ કરવું) કરીને રજૂ કરવા બદલ બીબીસીએ ગુરુવારે માફી માગી હતી. બ્રોડકાસ્ટરે આ ભાષણમાં એવા ચેડાં કર્યા હતાં કે જાણે ટ્રમ્પ હિંસાની હિમાયત કરી રહ્યાં છે. અમેરિકાના પ્રેસિડેન્ટે કાનૂની કાર્યવાહીની ધમકી આપ્યા પછી બીબીસીએ નાકલીટી તાણી હતી.
એક નિવેદનમાં બીબીસીએ જણાવ્યું હતું કે તેના વડા સમીર શાહે વ્હાઇટ હાઉસને એક વ્યક્તિગત પત્ર મોકલીને ટ્રમ્પને સ્પષ્ટ કર્યું હતું કે તેઓ અને કોર્પોરેશન આ ફેરફાર માટે દિલગીર છે અને તે હવેથી પેનોરમા ડોક્યુમેન્ટરીને તેના કોઈપણ પ્લેટફોર્મ પર ફરીથી પ્રસારિત કરશે નહીં. બીબીસી વીડીયો ક્લિપને જે રીતે સંપાદિત કરવામાં આવી છે તે અંગે દિલથી દિલગીર છે, પરંતુ અમે માનહાનિના દાવા માટે કોઈ આધાર હોવા અંગે સંપૂર્ણ અસંમત છીએ.
અગાઉ બીબીસી પક્ષપાત કરતી હોવાના આંતરિક આરોપો લીક થયાં હતાં. 2021ની ચૂંટણીમાં પરાજય પછી ટ્રમ્પના સમર્થકોએ કેપિટોલ (વ્હાઇટ હાઉસ) પર હુમલો કર્યો હતો. તે વખતના ટ્રમ્પના ભાષણમાં બીબીસીએ ચેડાં કર્યા હતાં. તેનાથી બીબીસીના બે ટોચના અધિકારીઓએ રાજીનામા આપવા પડ્યા હતાં અને ટ્રમ્પે એક અબજ ડોલરનો માનહાનીનો દાવો માંડવાની ધમકી આપી હતી. ટ્રમ્પના વકીલોએ બીબીસીને જણાવ્યું હતું કે તે પેનોરમા કાર્યક્રમ પાછો ખેંચે, પ્રેસિડન્ટની માફી માંગી અને તેમને થયેલા નુકસાન માટે યોગ્ય વળતર આપે, નહિતર ઓછામાં ઓછા $1 બિલિયનના મુકદ્દમાનો સામનો કરવા તૈયાર રહે.
