ભારતના ચૂંટણીપંચે ચાર રાજ્યો અને એક કેન્દ્રશાસિત પ્રદેશમાં વિધાનસભાની ચૂંટણીના સમયપત્રકની રવિવાર, 15 માર્ચે જાહેરાત કરી હતી. આસામ, કેરળ અને પુડુચેરીમાં 9 એપ્રિલે વિધાનસભાની ચૂંટણી યોજાશે, જ્યારે 23 એપ્રિલે તમિલનાડુમાં ચૂંટણી યોજાશે. આ ઉપરાંત પશ્ચિમ બંગાળમાં 23 એપ્રિલથી 29 એપ્રિલે બે તબક્કામાં મતદાન થશે.
નવી દિલ્હીમાં પત્રકાર પરિષદમાં મુખ્ય ચૂંટણી કમિશન જ્ઞાનેશ કુમારે આ અંગેની જાહેરાત કરતાં જણાવ્યું હતું કે ચાર રાજ્ય અને એક કેન્દ્રશાસિત પ્રદેશની કુલ 824 બેઠકો માટે મત ગણતરી 4 મેના રોજ થશે અને તે દિવસે જ રિઝલ્ટ જાહેર થશે. ચૂંટણી સંપૂર્ણપણે હિંસામુક્ત અને લાલચમુક્ત હોવી જોઈએ અને કોઈપણ પ્રકારના નિયમ ભંગ સામે ચૂંટણી પંચ કડક કાર્યવાહી કરશે.
ચૂંટણી કાર્યક્રમ જાહેર થતાં આ રાજ્યોમાં ચૂંટણીની આદર્શ આચારસંહિતા અમલી બની હતી. તમિલનાડુમાં કુલ 234 વિધાનસભા બેઠકો છે, રાજ્યમાં ડીએમકેના એમ કે સ્ટાલિન 7મે 2021થી મુખ્યપ્રધાન તરીકે કાર્યરત છે. રાજ્યમાં ભાજપનું વધારે વર્ચસ્વ નથી.
પશ્ચિમ બંગાળમાં કુલ 294 વિધાનસભા બેઠકો છે, રાજ્યમાં તૃણમૂલ કોંગ્રેસ પાર્ટીના નેતા મમતા બેનર્જી 2011થી સત્તામાં છે. રાજ્યમાં આ વખતે ખાસ કરીને તૃણમૂલ કોંગ્રેસ અને ભાજપ વચ્ચે ચૂંટણીજંગ ખેલાશે.
કેરળમાં કુલ 140 વિધાનસભા બેઠકો છે. રાજ્યમાં 2016થી લેફ્ટ ડેમોક્રેટિક ફ્રન્ટ (LDF)નું શાસન છે અને હાલમાં પિનરાયી વિજયન મુખ્યપ્રધાન છે. રાજ્યમાં ખાસ કરીને એલડીએફ અને કોંગ્રેસ ગઠબંધન વચ્ચે ચૂંટણીજંગ થશે. જોકે ભાજપ પણ આ વખતે ચમત્કાર સર્જીને અગ્રણી પક્ષ તરીકે ઊભરી આવે તેવું રાજકીય નિરીક્ષકો માને છે.
આસામમાં 126 વિધાનસભા બેઠકો છે અને આ ઉત્તરપૂર્વ રાજ્યમાં 2016થી ભાજપનું શાસન છે. રાજ્યમાં હિમંત બિસ્વા શર્મા મુખ્યપ્રધાન છે. રાજ્યમાં આ વખતે ખાસ કરીને ભાજપ અને કોંગ્રેસ વચ્ચે મુકાબલો થશે. પુડુચેરીના મુખ્યમંત્રી એન રંગાસ્વામી 2021થી સત્તામાં છે. કેન્દ્રશાસિત પ્રદેશમાં કુલ 33 બેઠકો છે. જેમાં કેન્દ્ર દ્વારા નોમિનેટેડ ત્રણ સભ્યોનો સમાવેશ થાય છે.
