હોર્મુઝ સ્ટ્રેટમાં યુદ્ધજહાજો મોકલવાની ટ્રમ્પની વિનંતને યુરોપના દેશોએ ફગાવી દીધી હતી. ઇરાન સામે યુદ્ધ વચ્ચે હોર્મુઝ સ્ટ્રેટને ઓઇલ ટેન્કરો માટે સુરક્ષિત રાખવા માટે યુદ્ધ જહાજો મોકલવાના અનુરોધને યુરોપના દેશો સહિતના ઘણા દેશોએ નકારી કાઢ્યા પછી અમેરિકાના પ્રમુખ ડોનાલ્ડ ટ્રમ્પે આ દેશો પર આકરા પ્રહાર કર્યાં હતાં. અગાઉ ટ્રમ્પે ચીન, બ્રિટન, જાપાન, યુરોપના દેશોને હાર્મુઝ ખાડીમાં તેમના યુદ્ધ જહાજો મોકલવાનો અનુરોધ કર્યો હતો. આનાથી ઇરાન સામેના યુદ્ધમાં ટ્રમ્પ એકલા પડ્યા છે અને નાટોનો સાથ મળી રહ્યો નથી.
અમેરિકાના અનેક ભાગીદાર દેશો જેમ કે જર્મની, સ્પેન અને ઇટલીએ જણાવ્યું હતું કે તેઓ પાસે આ વ્યૂહાત્મક જળમાર્ગને ફરી શરૂ કરવા માટે તાત્કાલિક રીતે જહાજ મોકલવાની કોઈ યોજના નથી. ઇરાને ડ્રોન અને નૌસેનાના માઇન્સ દ્વારા આ માર્ગને અસરકારક રીતે બંધ કરી દીધો છે.
જર્મન ચાન્સેલર ફ્રેડરિક મર્ઝે બર્લિનમાં જણાવ્યું કે અમને સંયુક્ત રાષ્ટ્ર, યુરોપિયન યુનિયન અથવા નાટોની જરૂરી સૂચના મળી નથી, જે અમારા બંધારણ હેઠળ આવશ્યક છે. વોશિંગ્ટન અને ઇઝરાયેલે યુદ્ધ શરૂ કરતા પહેલા જર્મની સાથે કોઈ ચર્ચા કરી નહોતી.
વોશિંગ્ટનમાં વ્હાઇટ હાઉસના એક કાર્યક્રમ દરમિયાન બોલતા ટ્રમ્પે કહ્યું હતું કે ઘણા દેશોએ મદદ કરવા માટે તૈયારી દર્શાવી છે, પરંતુ કેટલાંક લાંબા સમયથી સહયોગી દેશોના પ્રતિભાવથી તેઓ નિરાશ છે. કેટલાક દેશો ખૂબ ઉત્સાહિત છે અને કેટલાક નથી. કેટલાક એવા દેશો છે જેને અમે ઘણા વર્ષોથી મદદ કરી છે. અમે તેમને ભયાનક બાહ્ય ખતરાઓથી સુરક્ષિત રાખ્યા છે, છતાં તેઓ એટલા ઉત્સાહિત નથી. અને મારા માટે ઉત્સાહનું સ્તર મહત્વનું છે.
જાપાન અને ઓસ્ટ્રેલિયાએ હોર્મુઝ તરફ યુદ્ધ જહાજો મોકલવાની શક્યતાઓને નકારી કાઢી હતી. અમેરિકાના પરંપરાગત સાથીદાર બ્રિટને પણ ખાડી દેશોમાં ચાલી રહેલા યુદ્ધમાં ઝુકાવવા ઈનકાર કર્યો હતો. બ્રિટિશ વડાપ્રધાન કિમ સ્ટાર્મરે કહ્યું હતું કે, હોર્મુઝની ખાડી ફરી ખોલાવવા યુરોપના દેશોએ યોજના બનાવી છે. વૈશ્વિક બજારોની સ્થિરતા માટે હોર્મુઝની ખાડી શરૂ થવી જોઈએ, પરંતુ આ કામ સરળ નથી. યુદ્ધ શક્ય તેટલું જલદી પરું થવું જોઈએ અને મોટા યુદ્ધમાં જોડાવાની બ્રિટનની કોઈ ઈચ્છા નથી.
