ગુજરાત વિધાનસભાના ડેપ્યુટી સ્પીકર પદ માટે 16 ફેબ્રુઆરીએ યોજનારીની ચૂંટણીમાં ભાજપના ધારાસભ્ય પૂર્ણેશ મોદી અને કોંગ્રેસના ધારાસભ્ય શૈલેષ પરમારે શુક્રવાર, 13 ફેબ્રુઆરીએ ઉમેદવારી પત્રો ભર્યા હતાં. ૧૮૨ સભ્યોની વિધાનસભામાં ભાજપ પાસે ૧૬૨ બેઠકો સાથે પ્રચંડ બહુમતી હોવાથી પૂર્ણેશ મોદી જીતશે તે નિશ્ચિત છે. કોંગ્રેસ પાસે ફક્ત ૧૨ ધારાસભ્યો છે. ગયા વર્ષે ડિસેમ્બરમાં વર્તમાન જેઠાભાઈ ભરવાડે તેમના “વ્યસ્ત સમયપત્રક” ને ટાંકીને રાજીનામું આપ્યું હોવાથી ચૂંટણી જરૂરી બની છે.
પૂર્ણેશ મોદી સુરત પશ્ચિમના ધારાસભ્ય અને ભૂતપૂર્વ પ્રધાન છે. તેમણે પ્રધાન ઋષિકેશ પટેલની હાજરીમાં વિધાનસભા સચિવાલય ખાતે સત્તાવાર રીતે ઉમેદવારી ફોર્મ ભર્યું હતું. વિધાનસભાના ઉપાધ્યક્ષની 16 ફેબ્રુઆરીએ યોજાનારી ચૂંટણી માટે ભાજપ હાઈકમાન્ડ અનેક નામો પર મંથન કર્યાં પછી પૂર્ણેશ મોદીના નામ પર મહોર મારી હતી.
તાજેતરમાં શહેરાના ધારાસભ્ય જેઠા ભરવાડે ઉપાધ્યક્ષ પદેથી રાજીનામું આપ્યું હતું. જેના કારણે આ મહત્વનો બંધારણીય હોદ્દો ખાલી પડ્યો હતો.
પૂર્ણેશ મોદી અગાઉ કેબિનેટ પ્રધાન તરીકે માર્ગ-મકાન અને નાગરિક ઉડ્ડયન જેવા મહત્વના વિભાગો સંભાળી ચૂક્યા છે. વિધાનસભાની કાર્યવાહી અને નિયમો પર તેમની સારી પકડ છે, જે ઉપાધ્યક્ષ તરીકે ગૃહનું સંચાલન કરવામાં મદદરૂપ થશે. સુરત અને દક્ષિણ ગુજરાતમાં તેમનું મજબૂત સંગઠનાત્મક વર્ચસ્વ છે. સામાજિક અને પ્રાદેશિક સંતુલન જાળવવા પક્ષે આ વ્યૂહાત્મક નિર્ણય લીધો છે.
ગુજરાત વિધાનસભાનું બજેટ સત્ર ૧૬ ફેબ્રુઆરીથી શરૂ થશે અને ૨૫ માર્ચ સુધી ચાલશે, જેમાં ૨૦૨૬-૨૭નું બજેટ ૧૭ ફેબ્રુઆરીએ નાણામંત્રી કનુ દેસાઈ રજૂ કરશે.
૨૦૧૯માં પૂર્ણેશ મોદી ચર્ચામાં આવ્યાં હતાં. તેમણે કોંગ્રેસના નેતા અને વાયનાડના સાંસદ રાહુલ ગાંધી વિરુદ્ધ મોદી અટકનો ઉપયોગ કરીને વડાપ્રધાન નરેન્દ્ર મોદીની સરખામણી લલિત મોદી અને નીરવ મોદી જેવા ભાગેડુઓ સાથે કરવા બદલ ફોજદારી માનહાનિનો કેસ દાખલ કર્યો.
