અમેરિકાના વાઇસ પ્રેસિડન્ટ જે ડી વાન્સે જણાવ્યું હતું કે જે ઇમિગ્રન્ટ્સ અમેરિકાની નાગરિકતા મેળવે છે, તેઓએ પોતાને અમેરિકન તરીકે જ જોવા જોઈએ, ન કે તેઓ જ્યાંથી આવ્યા છે તે દેશના લોકો તરીકે. તેમણે અમેરિકામાં મહત્ત્વપૂર્ણ યોગદાન આપનારા ભારતીય ઇમિગ્રન્ટ્સની પુત્રી સાથે લગ્ન કર્યા છે, આમ છતાં તેમના સસરાએ ક્યારેય તેમને તેમના મૂળ દેશના હિત માટે કંઈ ખાસ કરવાની રજૂઆત કરી નથી.
વોશિંગ્ટનમાં યુનિવર્સિટી ઓફ જ્યોર્જિયામાં વિદ્યાર્થીઓને સંબોધતા વાન્સે કહ્યું તમે અમેરિકાના નાગરિક બનો છો ત્યારે નાગરિક તરીકે તમારી જવાબદારી એ છે કે તમે દેશના હિતમાં વિચાર કરો. તમારે તમે આવ્યા છે તે દેશના હિતનો વિચાર ન કરવો જોઇએ.
H-1B વિઝા સિસ્ટમમાં ફ્રોડ અને માતા-પિતાને હજુ સુધી ગ્રીન કાર્ડ મળ્યું ન હોવાની એક ભારતીય વિદ્યાર્થીએ ફરિયાદ કરતાં વાન્સે જણાવ્યું હતું કે તમારે પોતાને અમેરિકન તરીકે જ વિચારવું પડશે. સિસ્ટમ ત્યારે જ કામ કરે છે, જ્યારે દરેક વ્યક્તિ પોતાને અમેરિકન માને.
વાન્સે જણાવ્યું કે તેમના સસરા ભારતમાંથી અમેરિકામાં આવ્યાં હતાં, અહીં શિક્ષણ મેળવ્યું અને અમેરિકન નાગરિક બન્યા હતાં.મારા જીવનમાં ક્યારેય એક પણ વખત તેમણે એવું કહ્યું નથી કે ‘આ કરો’ અથવા ‘એ કરો’ કારણ કે તે મારા મૂળ દેશના હિતમાં છે
તેમણે ઉમેર્યું હતું કે નવી પેઢીના અમેરિકનોમાં આ પ્રકારની વિચારધારા વધે તો લોકો ઇમિગ્રન્ટ્સ પ્રત્યે વધુ સ્વાગતભાવ રાખશે. અમેરિકન બનવાનો અર્થ એ છે કે અમેરિકાના હિતને પ્રાથમિકતા આપે.
વાન્સે ઉષા વાન્સ સાથે લગ્ન કર્યા છે, જે લક્ષ્મી અને રાધાકૃષ્ણ ચિલીકુરીની પુત્રી છે. તેઓ 1980ના દાયકામાં અમેરિકા આવ્યાં હતાં.
