ઈરાન યુદ્ધના પગલે ખાસ તો દુબઈમાં ફસાઈ ગયેલા ભારતીય પ્રવાસીઓની વહારે દુબઈની એક ભારતીય રેસ્ટોરેન્ટ આવી છે. શહેરમાં બી-10, શોપ નં. 5 અને 6, શેખ હમાદાન કોલોની, કરામા ખાતે આવેલી મુંબઈ એક્સપ્રેસ રેસ્ટોરેન્ટ એન્ડ કાફેએ જાહેરાત કરી છે કે જરૂરતમંદ પ્રવાસીઓ સીધા કાફે આવી શકે છે અથવા ફોન નં. +971 4 370 8081 ઉપર સંપર્ક કરી શકે છે.
રેસ્ટોરેન્ટ સવારે 8 વાગ્યાથી રાત્રે 1 વાગ્યા સુધી તમામ મહેમાનોને વિના મૂલ્યે સવારનો નાસ્તો (ઈડલી સંભાર), બપોરનું ભોજન (પુલાવ) અને રાત્રીનું ભોજન (ફ્રાઈડ રાઈસ) આપશે. રેસ્ટોરેન્ટે જાહેરાત કરી છે કે, “દુબઈમાં ફસાયા છો? અમે આપની સેવામાં હાજર છીએ.”
ઈન્ડિયન એક્સપ્રેસ અખબારના અહેવાલ મુજબ મહારાષ્ટ્ર ભાજપના ધારાસભ્ય મિહિર કોટેચાએ આ ઓફર વિષે કહ્યું હતું કે રેસ્ટોરેન્ટની આ પહેલ મુશ્કેલ પરિસ્થિતિમાં આપણા લોકોના આત્મસન્માનની, સેવા, કરૂણાની છે. અમારો ધ્યેય છે કે, દુબઈમાં ફસાયેલો કોઈ ભારતીય ભૂખ્યો રહેવો જોઈએ નહીં. આવી સ્થિતિમાં સૌએ સાથે રહીને પરસ્પર મદદરૂપ બનવાની આપણા સૌની સહિયારી ફરજ, જવાબદારી છે.
