યુક હેલ્થ સિક્યુરિટી એજન્સી (UKHSA) એ ઇંગ્લેન્ડના કેન્ટના કેન્ટરબરીમાં મેનિન્જાઇટિસના કારણે બે લોકોના મૃત્યુ થયા હોવાની અને 15 લોકો હોસ્પિટલમાં દાખલ થઇ સારવાર લઇ રહ્યા હોવાની જાહેરાત કરી છે.
ક્વીન એલિઝાબેથ ગ્રામર સ્કૂલની 18 વર્ષની સીક્સ્થ ફોર્મની વિદ્યાર્થીની જુલિયટ અને કોન્ટરબરી યુનિવર્સિટીના 21 વર્ષીય વિદ્યાર્થીનું મૃત્યુ થયું છે. મેનિન્ગોકોકલ બી (મેનબી)ના ચાર કેસોને લેબોરેટરી દ્વારા પુષ્ટિ કરવામાં આવી છે. મેનિન્ગોકોકલ બી (મેનબી) યુવાનોને અસર કરે છે જે સૌથી સામાન્ય સ્ટ્રેઇન છે.
હેલ્થ સેક્રેટરી વેસ સ્ટ્રીટીંગે રોગચાળો ફાટી નીકળવાની વધતી ચિંતા વચ્ચે હાઉસ ઓફ કોમન્સને સંબોધન કર્યું હતું. UKHSA એ 5-7 માર્ચે કેન્ટરબરીમાં ક્લબ કેમિસ્ટ્રીની મુલાકાત લેનારા કોઈપણને રોગ નિવારક એન્ટિબાયોટિક સારવાર લેવાની સલાહ આપી છે. સરકાર નાઈટક્લબ અને કેન્ટ યુનિવર્સિટી સહિત ભાગીદારો સાથે મળીને ફેલાવાને મર્યાદિત કરવા માટે કામ કરી રહી છે.
ઉચ્ચ માંગને કારણે આ વિસ્તારની ફાર્મસીઓમાં મેનિન્ગોકોકલ બી (મેનબી) રસી ઓછી હોવાના અહેવાલ છે. જો કે કેન્ટ યુનિવર્સિટીએ પ્રભાવિત થયેલા વિદ્યાર્થીઓને સેનેટ બિલ્ડિંગમાં એન્ટિબાયોટિક્સનું વિતરણ કર્યું છે. રોગચાળાનો સમય પરીક્ષાઓ અને સમયમર્યાદા સાથે મેળ ખાય છે તેથી ઘણા વિદ્યાર્થીઓએ ચિંતા વ્યક્ત કરી છે.
UKHSA પરિસ્થિતિનું નજીકથી નિરીક્ષણ કરી રહી છે અને સ્થાનિક રહેવાસીઓને ચેપના વધુ ફેલાવાને રોકવા માટે જાહેર આરોગ્ય માર્ગદર્શિકાનું પાલન કરવા વિનંતી કરી છે.
2015થી નિયમિત બાળ રસીકરણના ભાગ રૂપે NHS દ્વારા દરેક બાળકને MenBની રસી અપાય છે. પરંતુ હાલમાં જે બાળકો 10 વર્ષથી વધુ ઉંમરના છે તેમણે તે રસી નિયમિત સમયપત્રકના ભાગ રૂપે પ્રાપ્ત કરી નથી.
મેનિન્ગોકોકલ મેનિન્જાઇટિસ અને સેપ્ટિસેમિયાના ચિહ્નો અને લક્ષણો
મેનિન્ગોકોકલ મેનિન્જાઇટિસ અને સેપ્ટિસેમિયાના ચિહ્નો અને લક્ષણોમાં તાવ, માથાનો દુખાવો, ઝડપી શ્વાસ, સુસ્તી, ધ્રુજારી, ઉલટી અને ઠંડા હાથ અને પગનો સમાવેશ થઈ શકે છે.
શરૂઆતના લક્ષણો ઘણીવાર શરદી, ફ્લૂ અથવા હેંગઓવર જેવી અન્ય બીમારીઓ સાથે મૂંઝવણમાં આવી શકે છે અને વિદ્યાર્થીઓ ખાસ કરીને પ્રારંભિક ચેતવણી આપતા ચિહ્નો ચૂકી જવાનું જોખમ ધરાવે છે. કોઈપણ લક્ષણો દેખાય, તો તાત્કાલિક GPનો સંપર્ક કરવા, NHS 111 પર કૉલ કરવા અથવા 999 પર ફોન કરવા વિનંતી છે.
