નવનાત વણિક એસોસિએશને જૈન સ્ટુડન્ટ ફોરમ યુકે (JSF) સાથે મળીને નવનાત સેન્ટર હેયસ ખાતે તા. 28 ફેબ્રુઆરીના રોજ વિશ્વનો સૌ પ્રથમ સમર્પિત જૈન સ્તવન જામિંગ કાર્યક્રમ યોજીને ઇતિહાસ રચ્યો હતો. મુખ્ય મહેમાન તરીકે હેરોના મેયર અંજનાબેન પટેલ ઉપસ્થિત રહ્યા હતા. તાજેતરના વર્ષોમાં ભજન ક્લબિંગ અને ભજન-શૈલીના જામ સેશનની લોકપ્રિયતામાં વધારો થયો છે.
નવનાતના જામીન સેશનમાં સંગીતકાર પ્રિયેશ અને તેમના સંગીતકાર ગૃપે ગિટાર, વાંસળી, ડ્રમ્સ અને તબલા સાથે ઉત્સાહી, સમકાલીન અને પરંપરાગત જૈન સ્તવનો રજૂ કર્યા હતા. ઉત્સાહપૂર્ણ પ્રસ્તુતિઓએ વાહવાહી મેળવી હતી અને હોલ તાળીઓથી ગુંજી ઉઠ્યો હતો.
જૈન સ્ટુડન્ટ ફોરમ યુકે (JSF)ના પ્રમુખ હીરક દોશીએ કહ્યું હતું કે “આ ફોર્મેટ પોતાની સંસ્કૃતિ સાથે ફરીથી જોડાવા માંગતા ઘણા યુવાનોને આકર્ષે છે અને અમને આજે એક મહાન સફળતા મળી હતી.”
નવનાતના પ્રમુખ જસવંતભાઈ દોશીએ જણાવ્યું હતું કે, “અમે લોકોમાં હાજરી અને ઉત્સાહથી આ નવા ફોર્મેટને સ્વીકારતા રોમાંચિત છીએ. લોકોનો પ્રતિસાદ એટલો સકારાત્મક રહ્યો હતો કે અમે તેને માસિક કાર્યક્રમ બનાવવાની યોજના બનાવી રહ્યા છીએ. આ યુકેમાં – અને કદાચ વિશ્વમાં પહેલો સમર્પિત સ્તવન જામીંગ કાર્યક્રમ હતો.”
કાર્યક્રમને ભરપૂર સફળતા મળી હતી અને કાર્યક્રમને અંતે મોટી સંખ્યામાં યુવાનો સહિત પ્રેક્ષકોએ પિઝા અને પાસ્તા સલાડની મોજ માણી હતી.
આગામી નવનાત જામીન કાર્યક્રમ 28-માર્ચ-2026 ના રોજ યોજાવાનો છે અને આયોજકો વધતી માંગને પહોંચી વળવા માટે અને ક્ષમતા વધારવાના માર્ગો શોધી રહ્યા છે.
