અમેરિકન પ્રેસિડેન્ટ ડોનાલ્ડ ટ્રમ્પે મેમ્ફિસ સેફ ટાસ્ક ફોર્સની રાઉન્ડ ટેબલ ચર્ચા દરમિયાન ભારતીય અમેરિકન FBI ડાયરેક્ટર કાશ પટેલની કામગીરીની પ્રશંસા કરી હતું. આ દરમિયાન કાશ પટેલે કહ્યું કે, આ કામગીરી દ્વારા પોલીસ તંત્રને ‘રેકોર્ડ ઐતિહાસિક સ્તરે’ હિંસક ગુનેગારોને પકડવામાં મદદ મળી છે.
મેમ્ફિસમાં આયોજિત કાર્યક્રમમાં, ટ્રમ્પે કાશ પટેલને સંબોધન કરવા આમંત્રણ આપતા અગાઉ તેમનો ઉષ્માસભર પરિચય આપ્યો હતો. ટ્રમ્પે કહ્યું હતું કે, ‘FBI ડાયરેક્ટર કાશ પટેલ, ખરેખર અદભુત વ્યક્તિ છે. તમારે તેમને ઓળખવા પડશે. એકવાર તમે તેમને ઓળખી લો, પછી તે એક અદભુત વ્યક્તિ છે.’
કાશ પટેલના નિવેદન પછી, ટ્રમ્પે ફરીથી તેમની પ્રશંસા કરતા કહ્યું કે, કાશનો, ખૂબ આભાર. ખૂબ સરસ. તેમણે ખૂબ સારું કામ કર્યું છે.’
કાશ પટેલે આ કાર્યક્રમનો ઉપયોગ તંત્રની કાયદો અને વ્યવસ્થાની કામગીરી અને મેમ્ફિસ સેઇફ ટાસ્ક ફોર્સના કાર્યોને જણાવવા માટે કર્યો હતો. અધિકારીઓએ જણાવ્યું હતું કે, છેલ્લા છ મહિનામાં શહેરમાં હિંસક ગુનાઓમાં તીવ્ર ઘટાડો નોંધાયો છે.
કાશ પટેલે ટ્રમ્પને સંબોધતા જણાવ્યું હતું કે, ‘તમે અમને બહાર જવાની અને ગેંગ બેંગર્સ, દુષ્કર્મીઓ, હત્યારા, ડ્રગ ડીલરોની રેકોર્ડ ઐતિહાસિક કક્ષાએ પકડવાની મંજૂરી આપી છે.’ કાશ પટેલે તેમની અંગત બાબતો વિશે પણ વાત કરી, તેમણે આ કાર્યક્રમમાં તેમનો ભારતીય અમેરિકન દૃષ્ટિકોણ રજૂ કરીને જણાવ્યું હતું કે, ‘મારા માટે, પ્રથમ પેઢીનું ભારતીય અમેરિકન બાળક, જેના માતાપિતા પૂર્વ આફ્રિકામાં નરસંહારમાંથી બચીને આવ્યા હતા, અને તે બાળક આજે FBIનો નવમો ડાયરેક્ટર છે, ‘મારા માટે આ એક એવું સ્વપ્ન છે જેની તમે કલ્પના પણ નહીં કરી શકો.’
