ગત વર્ષે 24 જૂનના રોજ લેસ્ટર રોયલ ઇન્ફર્મરી નજીકની એક ઘટનામાં 56 વર્ષીય નીલા પટેલની ક્રુર હત્યા કરવા બદલ દોષિતને તાજેતરમાં ઓછામાં ઓછા 21 વર્ષ અને છ મહિનાની જેલ સજા સાથે આજીવન કેદની સજા ફટકારવામાં આવી હતી. ઘટના સમયે ગાંજાના વ્યસની અને ડ્રગ ડીલર એવો આરોપી જે કાર ચલાવી રહ્યો હતો તે પલટી ગઇ હતી અને પછી તેણે ત્યાંથી પસાર થઇ રહેલા નીલા પટેલ પર જીવલેણ હુમલો કર્યો હતો. 24 વર્ષીય ડ્રગ ડીલર ચુકવુમેકા અહાનોનુ યુનિવર્સિટીનો ભૂતપૂર્વ વિદ્યાર્થી છે અને તે બે સંતાનોની માતા 56 વર્ષીય માતા નીલા પટેલને ઓળખતો નહોતો. તેણે નીલા પટેલને સંપૂણ તાકાતથી મુક્કા અને લાત મારી હતી, જેના કારણે તેમના મગજમાં ઇજા થઇ હતી અને બે દિવસ પછી તેમનું હોસ્પિટલમાં મૃત્યુ થયું હતું. નીલા પટેલ બસમાંથી ઉતરીને તેમના ઘર તરફ જઈ રહ્યા હતા ત્યારે આ ઘટના બની હતી. લેસ્ટરના ડોવર સ્ટ્રીટનો રહેવાસી અહાનોનુએ હત્યા કરી હોવાનો શરૂઆતમાં ઇનકાર કર્યો હતો. લેસ્ટર ક્રાઉન કોર્ટમાં એક મહિનાની ટ્રાયલ પછી જ્યૂરી દ્વારા તાજેતરમાં તેને હત્યા માટે દોષિત ઠેરવવામાં આવ્યો હતો.
